अमेरिकी स्वतन्त्रता दिवस मनाउँदा ३३ जनाको मृत्यु

वासिंगटन- अमेरिकी स्वतन्त्रता दिवस मनाउने क्रममा भएका विभिन्न घटनामा परी कम्तीमा ३३ जनाको मृत्यु भएको छ।

देशको सिकागोमा ११ जनासहित कम्तीमा ३३ जनाको मृत्यु भएको अमेरिकी अधिकारीलाई उद्धृत गर्दै एपीले समाचार प्रकाशन गरेको छ।

अमेरिकी स्वतन्त्रता दिवास जुलाई ४ यी घटना भएका हुन्। घटनामा परी दर्जनौं घाइते भएका छन्।

स्वतन्त्रता दिवस मनाउने क्रममा अमेरिकामा बर्सेनि मानिसहरूको हाताहाती हुँदै आएको छ।

सिकागोमा शुक्रबार बिहान मात्रै कम्तीमा ११ जनाको मृत्यु भएको थियो भने ५५ जना घाइते भएका छन्।

बिहीबार भएको सामूहिक गोलीबारीमा दुई महिला र एक आठ वर्षीय बालकको मृत्यु भएको थियो।

‘भर्खरको हिंसाले हाम्रो सहरलाई शोकमा डुबाएको छ,’ सिकागोका मेयर ब्रान्डन जोनसनले भनेका छन्, ‘घटनाहरूबाट प्रभावित परिवार र समुदायहरूप्रति हार्दिक समवेदना व्यक्त गर्दछौँ।’

यस्तै क्यालिफोर्नियामा २ जनाको मृत्य भएको छ भने तीन जना घाइते भएका छन्।

ओहियो राज्यमा २३ वर्षीय युवाको गोली हानी हत्या गरेको आरोपमा १५ वर्षीय किशोर पक्राउ परेका छन्। यस्तै गोली प्रहारबाट १० वर्षीया बालिकाको पनि क्लिभल्यान्डमा मृत्यु भएको छ।

बिहीबार राती भएको गोलीबारीमा १९ वर्षीय किशोरको मृत्यु भएको छ भने ६ जना घाइते भएका छन्।

म्यासाच्युसेटस अन्तर्गत बोस्टनका कम्तीमा तीन स्थानमा गोलाबारी भएको छ। तीमध्ये एक गोलबारीमा परीमा एक जनाको मृत्यु भएको छ।

जुलाई ४ को भोजमा सहभागी भएकी एक महिला कनेक्टिकटमा कारमै मृत फेला फरेकी छन्।

न्युयोर्क, फ्लोरिडा र मिसिगनमा पनि गोलीबारी, चक्कु प्रहारलगायतका घटनामा परी थुप्रै घाइते भएका छन्।

नर्थ क्यारोलिनामा आतिशबाजी गर्ने क्रममा एक जनाको मृत्यु भएको छ।

सेन्ट लुइस क्षेत्रमा दुई जनाको मृत्यु भएको छ भने ५ जना घाइते भएका छन्।