ओलीले पाए दुई तिहाईभन्दा बढी सांसदको समर्थन, पक्षमा १८८

काठमाडौँ- प्रधानमन्त्री केपी शर्मा ओलीले विश्वासको मत पाएका छन्।

असार ३० गते प्रधानमन्त्रीमा नियुक्त ओलीले आइतबार प्रतिनिधि सभामा राखेको विश्वासको मतसम्बन्धी प्रस्ताव दुई तिहाई बहुमतले पारित भएको हो।

ओलीलाई १८८ जना प्रतिनिधि सभाका सांसदले विश्वासको मत दिएका हुन्।

२७५ सदस्यीय प्रतिनिधि सभामा दुई तिहाई मतका लागि १८४ मत चाहिन्छ।

ओलीले राखेको विश्वासको मतसम्बन्धी प्रस्तावको विपक्षमा ७४ जना सांसदले मतदान गरेका थिए।

२६३ जना उपस्थित बैठकमा एक जना तटस्थ बसेका थिए।

प्रधानमन्त्रीले नियुक्त भएको ३० दिनभित्र विश्वासको मत लिनुपर्ने संवैधानिक व्यवस्था छ।

यसअघि तत्कालीन प्रधानमन्त्री पुष्पकमल दाहाल ‘प्रचण्ड’ नेतृत्वको सरकार विश्वासको मत नपाएर ढलेको थियो।

प्रचण्ड सरकार ढलेपछि कांग्रेससमेतको समर्थनमा एमाले अध्यक्ष ओली प्रधानमन्त्रीमा नियुक्त भएका थिए।

प्रचण्डले असार २८ गते प्रतिनिधि सभामा राखेको प्रस्तावलाई बहुमत सांसदले अस्वीकृत गरिदिएका थिए।

प्रतिनिधि सभामा राखेको विश्वासको मतको विपक्षमा दुई तिहाई भन्दा बढी सांसदले मत दिएपछि प्रचण्ड सरकार ढलेको थियो।

त्यसबेला प्रचण्डको पक्षमा जम्मा ६३ मत पर्दा विपक्षमा १९४ मत परेको थियो।

२७५ सदस्यीय प्रतिनिधिसभामा बहुमतका लागि १३८ मत चाहिन्थ्यो। तर उक्त मत जुटाउन नसक्दा प्रचण्ड सरकार ढल्न पुग्यो।

प्रचण्डको पक्षमा माओवादीका ३२, रास्वपाका २१ र एकीकृत समाजवादीका १० गरी जम्मा ६३ जनाले मात्र मत दिएका थिए।

पछिल्लोपटक माओवादी केन्द्रका अध्यक्ष प्रचण्ड ११ पुस २०७९ मा प्रधानमन्त्री बनेका थिए। उनले ४ पटक विश्वासको मत पाएका थिए। पाचौँ पटकमा विश्वासको मत नपाएर उनले सत्ता ओलीलाई सुम्पनु परेको थियो।

२०७९ पुस १० मा प्रधानमन्त्रीमा नियुक्त भएका प्रचण्डले पुस २६ मा विश्वासको मत लिए। त्यति बेला प्रचण्डले २६८ मत पाए।

नेपाल मजदुर किसान पार्टी (नेमकिपा) का सांसद प्रेम सुवाल र र राष्ट्रिय जनमोर्चाका सांसद चित्रबाहदुर केसीबाहेक सबैले प्रचण्डलाई मत दिएका थिए।

प्रचण्डले एमालेलाई छाडेर कांग्रेससँग जोडिएपछि दोस्रोपटक ०७९ चैत ५ मा विश्वासको मत लिएका थिए। त्यति बेला प्रचण्डले १७२ मत प्राप्त गरेका थिए।

कांग्रेससँगको गठबन्धन तोडेर एमालेसँग पुनः सहकार्यमा जोडिएपछि प्रचण्डले २०८० फागुन ३० मा तेस्रोपटक विश्वासको मत लिए। त्यसबेला उनको पक्षमा १५७ सांसद थिए।

जसपा नेपाल सरकारबाट अलग भएपछि २०८१ जेठ ७ मा प्रचण्डले चौथोपटक विश्वासको मत लिए। त्यतिबेला पनि उनले १५७ मत नै प्राप्त गरेका थिए।

तस्बिरहरू