नागरिक उड्यन प्राधिकरणलाई छुट्टाछुट्टै निकाय बनाउँन कांग्रेसद्वारा प्रधानमन्त्रीको ध्यानाकर्षण

काठमाडौँ- नागरिक उड्यन प्राधिकरणलाई सेवा प्रदायक र नियामक गरी छुट्टाछुट्टै निकाय बनाउन सत्ता गठबन्धन भित्रकै नेपाली कांग्रेसले प्रधानमन्त्री केपी शर्मा ओलीको ध्यानाकर्षण गराएको छ।

कांग्रेस नेताहरुले आइतबार बेलुका प्रधानमन्त्री ओलीलाई भेटेरआईकाओ र ईयू दुबैले विद्यमान नागरिक उड्डयन प्राधिकरणलाई सेवाप्रदायक र नियामक छुट्याउन भनेको दशकौं भइसक्दा पनि कार्यान्वयन नभएको भन्दै ध्यानाकर्षण गराएका हुन्।

नागरिक उड्डयन प्राधिकरण हवाई सुरक्षामा संवेदनशील नभएको र कार्यकारी प्रमुखको भूमिका पनि सन्तोषजनक र जिम्मेवार नभएको भन्दै कांंग्रेस सांसदहरुले प्रधानमन्त्री ओलीको ध्यानाकर्षण गराएका थिए।

प्रधानमन्त्री ओलीले दुई हवाई क्षेत्रका दुई निकाय छुट्याउन सकिने बताएका थिए। त्यसका लागि विधेयक ल्याउन सकिने र विभागीय मन्त्रीसँग छलफल गर्ने वचनसमेत दिएको कांग्रेसका एक सांसदले बताए।

प्रधानमन्त्रीसँगको भेटमा पार्टी सभापति शेरबहादुर देउवा, गृहमन्त्री रमेश लेखक, परराष्ट्रमन्त्री आरजु राणा, सांसदहरू उदय शमशेर राणा, राजन केसी, सञ्जय गौतम र राजेन्द्र बजगाई सहभागी थिए।

एमालेबाट प्रधानमन्त्री एवम् पार्टी अध्यक्ष केपी शर्मा ओली, महासचिव शंकर पोखरेल, विष्णु रिमाल, प्रमुख सचेतक महेश बर्तौला लगायत थिए।