त्रिशूलीको बाढीले दुवै गाडी बगाएको निष्कर्ष, यस्ता छन् दुर्घटनाका कारण

काठमाडौँ- सिमलतालमा दुर्घटनाबारे अध्ययन गर्न गठित कार्यदलले अध्ययन प्रतिवेदन बुझाएको छ। सहसचिव छवि रिजाल नेतृत्वको कार्यदलले मंगलबार गृहमन्त्री रमेश लेखकलाई प्रतिवेदन बुझाएको हो।

चितवनको भरतपुर महानगरपालिका–२९ स्थित सिमलतालमा दुई गाडी र त्यसमा सवार ६२ जना बेपत्ता भएपछि अध्ययन कार्यदल गठन गरिएको थियो। 

सिमलताल–बाङ्गेसाल–डुम्रेगाउँ सडक बनाउँदा भएको कमजोरीको कारण दुई वटा डिलक्स बस त्रिशूलीमा खसेको छानबिन कार्यदलको निष्कर्ष छ। उक्त सडक हालै मात्र बनाइएको थियो। 

‘सडक बनाउँदा कट एण्ड फिल एप्रोचमा काम नगरेर कटिङबाट मात्र सडक बनाउँदा अत्यधिक निस्केको माटो छेउमा फ्याँकिएको र टेवा पर्खाल नहुँदा डेब्रिज सिन्दुरे खोल्सा हुँदै बगेको देखिन्छ,’ प्रतिवेदनमा भनिएको छ। 

कमजोर भूगोल तथा अत्यधिक क्रस स्लोप भएको र इन्जिनियरिङ डिजाइन बिनाको सडक बनाउँदा बर्सातमा त्यसको असर देखिएको कार्यदलले आफ्नो प्रतिवेदनमा उल्लेख गरेको छ।

बगेका दुवै गाडी प्रेसर चेक ड्याम र ग्याबिन वालले धान्न नसकेपछि त्रिशूलीमा पुगेको र नदीले दुवै गाडी बगाएको कार्यदलको निष्कर्ष छ।

असार ३१ मा गृहमन्त्री बनेका लेखकले सोही दिन कार्यदल बनाएका हुन्।

सडक बनाउँदा वातावरणीय पक्षको ध्यान नदिएको र सडक सुरक्षासम्बन्धी एकीकृत सूचना प्रणालीको विकास नगरिँदा दुर्घटना हुन पुगेको लेखिएको छ। ‘एकीकृत सूचना प्रणाली नहुँदा सवारी चालकले सडकको अवस्था पूर्वानुमान नगरेको र सुरक्षाकर्मीले पनि बस रोक्न आवश्यक ठानेनन्,’ प्रतिवेदनमा उल्लेख छ।

दुर्घटनामा ज्यान गुमाएका र बेपत्ता भएकाहरूको परिवारलाई २ लाखको दरले राहत दिन कार्यदलको सिफारिस छ।

सनाखत भएका १९ जना र बेपत्ता ४० जना पीडितको घर ठेगानाको जिल्ला प्रशासन कार्यालयबाट राहत दिनुपर्ने कार्यदलले सिफारिस गरेको छ।

त्यस्तै घाइतेहरूको निःशुल्क उपचारको व्यवस्था गर्न सिफारिस गरिएको छ।

असार २८ मा बागमती प्रदेश–०३–००१ ख २४९५ नम्बरको गणपति र बागमती प्रदेश–०३–००६ ख १५१६ नम्बरको एन्जल डिलक्स त्रिशूलीमा खसेर बेपत्ता भएका थिए। दुवै बस र ४० जना यात्रुको अवस्था अझै अज्ञात छ। बसमा सवार २५ जनाको शव भेटिएको छ।