‘शंकाले लंका जलाउँछ’ भन्ने सन्देशसहितको म्युजिकल फिल्म ‘प्याकुली’

काठमाडौँ- वैदेशिक रोजगारीमा गएको युवाको कथामा आधारित म्युजिकल फिल्म ‘प्याकुली’ सार्वजनिक भएको छ।

नीतिन चन्दले निर्देशन गरेको गीतको भिडियोमा आरआर खड्का, तलीशा गुरूङ, महेश खड्का, घनश्याम जोशी, बाल कलाकार रोनिश खड्का, अर्जुनकाजी श्रेष्ठको अभिनय छ।

आरआर (रामहरि) खड्काको शब्दमा रहेको गीतमा बाबुल गिरीको संगीत र स्वर छ। शिशिर गरूङले निर्माण गरेको भिडियोलाई दिनेश पराजुलीले खिचेका हुन्।

लाइक माइण्डस् नेपालले सम्पादन गरेको भिडियोको कलर ग्राफिक्समा राकेश दाहालले योगदान दिएका छन्। क्रियटिभ डाइरेक्टर शिशिर अर्याल र सहायक निर्देशक उत्सव पौडेल छन्।

समाजको कथालाई आफै भोगेर शब्दमा उतारेका खड्काले म्युजिक भिडियोका मुख्य चरित्र निर्वाह गरेका छन्। ‘अरूका कुरा सुनेकै भरमा ठूला घटना भइरहेका छन्। श्रम गर्ने परिवारले कागले कान लग्यो भनेर पछि लाग्ने भन्दा पनि कान छाम्ने गरौं। यो गीतको यही सन्देश हो’ उनले भने।

खड्काले यो घर–घरको कथा भएको बताए। ‘अधिकांश मान्छे विदेशमा छन्। श्रीमान विदेशमा, श्रीमती गाउँमा, सफा नियतले पनि बोल्नै अप्ठ्यारो छ। मैलै गाउँमै भोगेको कथा हो’ खड्काले भने, ‘समाजप्रति दायित्व लागेर यो निर्माण गरेका हौं। मनोरञ्जन मात्र होइन सन्देश पनि दिउ भन्ने मुख्य ध्येय हो’ उनले भने। यो फिल्मले शंकाले लंका जलाउछ भन्ने सन्देश दिन खोजेको छ।

गीतको भिडियोमा अभिनय गरेकी गुरूङले नेपाली समाजको कथालाई प्रस्तुत गर्ने पात्रको रूपमा काम गर्न पाउँदा खुसी लागेको बताइन्। कलाकार महेश खड्काले प्याकुलीमा जोडिन पाउँदा आफ्नो कामलाई फरक पाएको बताए।

गायक बाबुल गिरीले यो अहिलेसम्मकै फरक खालको उत्कृष्ट गीत भएको बताए। समाजको कथामा चित्रण गरिएको गीतमा सहकार्य गर्न पाउँदा खुसी लागेको उनको भनाइ छ।

कलाकार तथा निर्देशक दीपाश्री निरौलाले चलिरहेको भन्दा फरक परिवेशमा बनेको गीत उत्कृष्ट भएको बताइन्। ‘बाकसमा शव आउने तथा अन्य दृश्यले दशैको माहोल फिल भयो’ उनले भनिन्। गीत सार्वजनिक समारोहमा दिपाश्रीसहित शिवहरि पौडेल, गीतकार शंकर अधिकारी गायल, निर्देशक ज्ञानेन्द्र देउजा लगायत कलाकर्मीको उपस्थिती थियो।