दक्षिण सुडानमा ७ लाखभन्दा बढी मानिस बाढीबाट प्रभावित

काठमाडौँ-  दक्षिण सुडानमा आएको बाढीबाट ७ लाखभन्दा बढी मानिस प्रभावित भएका छन्।

दक्षिण सुडान र अबेई प्रशासनिक क्षेत्रका ७८ काउन्टीमध्ये ३० काउउन्टीमा करिब सात लाख मानिस प्रभावित भएका संयुक्त राष्ट्रसङ्घीय राहतसम्बन्धी संस्थाले जानकारी दिएको हो।

मे महिनादेखि सुरु भएको भारी वर्षाका कारण आएको बाढीले गम्भीर खाद्यान्न असुरक्षा, आर्थिक गिरावटजस्ता गम्भीर मानवीय सङ्कट निम्त्याएको छ।

संस्थाले दक्षिण सुडानको राजधानी जुबामा जारी गरेको विज्ञप्तिमा भनिएको छ, ‘बाढीले मेदेखि घर, बाली र महत्वपूर्ण पूर्वाधारमा व्यापक क्षति पुर्‍याएको छ। शिक्षा र स्वास्थ्य सेवाहरू अवरुद्ध भएको र रोगको प्रकोपको जोखिम बढेको छ।’

सोमबार र मङ्गलबार जुबामा भएको उच्चस्तरीय छलफलमा सन् २०२४ को बाढी र प्रतिकार्य योजनाको पूर्वतयारीका लागि समीक्षा गरिएको छ।

संयुक्त राष्ट्रसङ्घीय निकायले बढ्दो प्रकोपलाई सम्बोधन गर्न समन्वयात्मक कार्यको लागि आह्वान गरेको छ।

मानवीय साझेदारहरूले जीवन बचाउने सहायताको साथ बाढी प्रभावितहरूका तत्कालका आवश्यकतालाई द्रुत रूपमा समाधान गर्ने काम गरिरहेका छन्।

देशको जलस्रोत तथा सिँचाइ मन्त्रालयले अगस्ट २० मा नाइल नदीको तल्लो क्षेत्रका समुदायहरूलाई स्थानान्तरण गर्न तत्काल अपिल जारी गरेको थियो।

जुबा काउन्टीको मङ्गला टेलिमेट्रिक स्टेशनमा पानीको स्तर १४.८५ मिटरको पाँच वर्षको उच्चस्तरमा पुगेको छ।