राजीनामा दिने दिल्लीका मुख्यमन्त्री केजरीवालको घोषणा

काठमाडौँ– भारतको दिल्लीका मुख्यमन्त्री अरविन्द केजरीवालले राजीनामा दिने घोषणा गरेका छन्। आइतबार कार्यकर्तालाई सम्बोधन गर्दै उनले राजीनामा दिने घोषणा गरेका हुन्।

जनताले ‘इमान्दारीको प्रमाणपत्र’ नदिएसम्म मुख्यमन्त्रीको पदमा नफर्कनेसमेत बताएका छन्।

‘जनताले इमान्दारी र निष्ठाको प्रमाण दिएपछि मात्र म मुख्यमन्त्रीको कुर्सीमा बस्छु। म अब अग्निपरीक्षा दिन चाहन्छु,’ केजरीवालले कार्यकर्ताहरूसँग भनेका थिए।

शुक्रबार मात्रै अदालतले केजरीवाललाई जमानतमा रिहा गर्न आदेश गरेको थियो।

फरक प्रसंगमा केजरीवालले दिल्लीको विधानसभा चुनाव नोभेम्बरमै गर्नसमेत माग गरेका छन्। दिल्लीको विधानसभा चुनाव आगामी फेब्रुअरीका लागि तय गरिएको छ।

कथित मदिरा भ्रष्टाचार प्रकरणमा केजरीवाललाई भारतको केन्द्रीय जाँच ब्युरो सीबीआइले पक्राउ गरेको थियो। तर, उनले यसविरुद्ध न्यायालय गुहारेका थिए।

सर्वोच्च अदालतबाट जमानत पाएसँगै शुक्रबार मात्रै उनी रिहा भएका थिए। उनी १५६ दिनसम्म तिहाड जेलमा बसेका थिए। त्यसअघि करिब २० दिन उनी प्रहरी हिरासतमा बसेका थिए।

जेलबाहिर आएपछि उनले आम आदमीका कार्यकर्तालाई सम्बोधन गरेका थिए। उनले जेलबाट निस्किएलगत्तै भारतीय जनता पार्टीप्रति निशाना साँधे। केजरीवालले भने, ‘उनीहरूको जेलले मेरो हौसला र आत्मविश्वास तोड्न सकेन।’

सर्वोच्च अदालतले मदिरा नीतिसँग सम्बन्धित सीबीआईको मुद्दा प्रकरणमा उनलाई धरौटीमा रिहा गर्न आदेश दिएको हो। अदालतले आफ्नो आदेशमा केजरीवालले १० लाख रुपैयाँ धरौटी तिर्नुपर्ने बताएको थियो।

न्यायाधीश सूर्यकान्त र उज्ज्वल भुयनको इजलासले उक्त मुद्दाको सुनुवाइ गरेको थियो।

यसअघि लोकसभा चुनावलाई ध्यानमा राख्दै सर्वोच्च अदालतले मे १० मा उनलाई चुनाव प्रचारका लागि २१ दिन अर्थात् जुन २ सम्म जेल बाहिरै बस्ने सुविधा दिएको थियो।

आम आद्मी‍ पार्टीले भारतीय जनता पार्टीले केन्द्रीय एजेन्सीहरू प्रयोग गरेर विपक्षी नेताहरूलाई झुटा मुद्दामा फसाएको आरोप लगाउँदै आएको छ।