च्याम्पियन्स लिगः पहिलो लेगमा सिटी र रियलको बराबरी

काठमाडौं – च्याम्पियन्स लिगको सेमीफाइनल खेलको पहिलो लेगमा इंग्लिस क्लब म्यानचेस्टर सिटीले स्पेनिस क्लब रियल मड्रिडसँग १–१ को बराबरी खेलेको छ। मड्रिडस्थित सान्टियागो बर्नाबेउमा सम्पन्न खेलमा रियलले अग्रता बनाए पनि सिटीले गोल फर्काएपछि खेल बराबरी भएको हो।

खेलको ३६ औं मिनेटमा ब्राजिली फरवार्ड भिनिसियस जुनियरले गोल गरेपछि पहिलो हाफमा घरेलु टिमल एक गोलले अघि थियो। गोलका लागि भिनिसियसलाई कामाभिंगाले पास उपलब्ध गराएका थिए। तर ६७ औं मिनेटमा इल्के गुन्डोगनले दिएको पासमा केभिन डिब्रुएनाले गोल गरेपछि खेल बराबरीमा आएको हो।

इंग्लिस क्लबले रियलविरुद्ध उसकै मैदानमा ५६ प्रतिसत समय बलमा नियन्त्रण बनाउँदै दबाबमा राख्न खोजेको थियो। उसले रियलको पोस्टमा ६ पटक प्रहार पनि गर्यो। तर बाँकी सबै प्रहार गोकिपर थियाउट कोटुवाले बचाएका थिए। उनले हाल्यान्डको दुईका साथै डिब्रुएना र रोड्रिको गोल निकै मुश्किलले बचाएका थिए।

गएराति बराबरी गएपछि सिटी लगातार २१ खेलमा अपराजित छ। एसले पछिल्लो समय टोटेनहममा पराजय बेहोरेपछि हारेको छैन। यता भिनिसियस जुनियरले आफ्ना पछिल्ला २२ खेलमा ११ गोल र ११ एसिस्ट गरिसकेका छन्।

त्यस्तै, उनले गएराति ३६ औं मिनेटमा गरेको गोल नै रियलले पोस्टमा गरेको पहिलो प्रहार थियो। अब यि दुई टिमले दोस्रो लेगको खेल मे १८ मा म्यानचेस्टर सिटीको मैदानमा हुनेछ।