एमाले तेह्रथुमको जिल्ला अधिवेशनमा भएन सहमति, अध्यक्षमा भिड्दै श्रेष्ठ र ढुंगाना

तेह्रथुम- तेह्रथुम एमालेको जिल्ला अध्यक्ष चयन गर्न मतदान हुने भएको छ। दुई पक्षबीच सहमति हुन नसक्दा मतदानमार्फत जिल्ला कमिटी चयन हुने पक्का भएको हो।

मंगलबार र बुधबार सहमतिको प्रयास भए पनि अध्यक्षका प्रत्यासीद्वय गोविन्दराज श्रेष्ठ र शिवप्रसाद ढुंगानाबीच सहमति हुन नसक्दा मतदानमार्फत अध्यक्ष चयन हुने भएको हो।

दुवैपक्ष प्यानलसहित चुनावी प्रतिस्पर्धामा छन्।

एमाले उपाध्यक्ष गुरु बराल तथा कोशी प्रदेशका पूर्वमुख्यमन्त्री शेरधन राई, विजय सुब्बालगायतका नेताले सहमतिको प्रयास गरेको भए पनि सफल हुन सकेन।

श्रेष्ठलाई हालका जिल्ला अध्यक्ष तेजमान कन्दङ्गवालगायतको साथ छ। ढुंगानालाई लक्ष्मण तिवारीलगायतको साथ छ।

छथर गाउँपालिकाका वर्तमान अध्यक्ष सन्तोष तिगेलालाई दुवैपक्षले आ-आफ्नो पक्षका दाबी गर्दै आएका छन्। उनी उपाध्यक्षमा निर्विरोध बनिसकेका छन्।

सचिवमा ढुंगाना प्यानलबाट छत्रप्रसाद रिमाल र श्रेष्ठ प्यानलबाट तारामान मादेन उम्मेदवार छन्।

तेह्रथुम एमाले अध्यक्ष एवम् प्रधानमन्त्री केपी शर्मा ओलीको जन्मजिल्ला हो।