विराटनगरका बसिरले एकै बलमा कसरी जोडे १५ रन?

काठमाडौँ- नेपाल प्रिमियर लिग (एनपीएल) चितवन राइनोजविरुद्ध मैदानमा उत्रिएको विराटनगरका बसिर अहमदले एकै बलमा १५ रन बनाएका छन्। एनपीएलमा एकै बलमा सबैभन्दा बढी रन जोडेर कीर्तिमान बनाएका हुन्।

चितवनका बलर अमर सिंह राउटेलाको ओभरमा विराटनगरका बसिरले एकै बलमा १५ रन बनाएका हुन्।

खेलको ११औं ओभरमा बलिङ गर्न आएका राउटेलाको बलमा बसिरले छक्का हाने। उक्त बल ‘नो बल’ भयो। यसरी उनले ७ रन जोडिसकेका थिए। नो बल बनेपछि राउटेलाले फेरि बलिङ गर्नुपर्ने भयो। त्यसमा बसिरले २ रन बनाइदिए। तर फेरि ‘नो बल’ भयो। ‘नो बल’ हुँदा कुल ३ रन आयो। यसरी १० रन पुगिसकेको थियो। राउटेलाले फेरि बल फाल्नुपर्‍यो। त्यो बल पनि ‘नो बल’ हुँदा १ रन आयो। यसरी ११ रन बनिसकेको थियो। ३ पटक ‘नो बल’ फालेपछि फेरि राउटेलाले गरेको लेगल डेलिभरीमा बसिरले चौका पड्काए। यसरी एउटै बलका लागि राउटेलाले चार पटक बलिङ गर्नपुर्‍यो। एकै बलमा बसिरले १५ रन जोडिदिए।

राउटेलाले गरेको ११औँ ओभरमा मात्र २२ रन खर्चिएका थिए।

यसअघि एनपीएलमा एकै बलमा ११ रन बनेको थियो। जनकपुर बोल्ट्सले विराटनगर किंग्सविरुद्धको उद्घाटन खेलमै एकै बलमा ११ रन जोडेको थियो।

विराटनगरका क्रिस सोल बलिङमा थिए। जनकपुरका कप्तान अनिल शाह स्ट्राइकमा हुँदा पहिलो बल वाइड चौका बन्दा जनकपुरले ५ रन जोड्यो। यस्तै त्यसपछि पनि सोलले वाइड बल फाल्दा विराटनगरले एक रन पाएको थियो। फेरि लेगल डेलीभरी गर्दा जनकपुरले ५ रन जोडेको थियो। यसरी उसले ११ रन बनाएको थियो।