घरेलु मैदानमै हार्‍यो बार्सिलोना

काठमाडौँ– स्पेनी ला-लिगाको शीर्षमा रहेको बार्सिलोना‍ले आफ्नै पराजयको नतिजा भोगेको छ। आइतबार भएको लेगानेसँगको खेलमा बार्सिलोनाले १–० को हार व्यहोरेको हो।

बार्सिलोनाको १८ खेलबाट ३८ अंक मात्र भएको छ। लेगानेसका लागि सर्जियो गोन्जालेजले चौथो मिनेटमै हेड गोल गरेका थिए। त्यसपछि खेलमा कुनै पनि टिमले गोल गर्न सकेनन्। बार्साले आक्रमण गरेपनि कुनै पनि अवसर गोलमा परिणत भने भएनन्।

बार्सिलोनाले पछिल्ला ६ खेलमध्ये तीन खेलामा पराजित भएको छ। बार्सिलोनाको हारपछि उसका खेलाडी पेड्रीले आफ्ना सबै साथी खेलाडी निराश रहेको स्विकारे। ‘खेलमा हाम्रो प्रदर्शन निकै निराशाजनक रह्यो। हामी सुतिरहेका जस्तै थियौँ। अब हामीलाई चाँडै उठ्नु छ। आक्रमणमा हामीलाई निर्णायक हुनु नै पर्छ,’ उनले भने।

आइतबारकै अर्को खेलमा एटलेटिको म्याड्रिडले गेटाफेलाई १–० ले हराएको छ। त्यसमा एलेक्जान्डर सोरिथले निर्णायक गोल गरेका थिए।

एटलेटिको समान ३८ अंकमै दोस्रोमा छ भने रियल म्याड्रिड ३७ अंकमा तेस्रो स्थानमा छ। बार्सिलोनाको तुलनामा दुवै म्याड्रिड क्लबले एक खेल कम खेलेको छ।