पोखराका साढे ६ सय स्वयंसेविकालाई स्वास्थ्य सामग्री वितरण

पोखरा- पोखरा महानगरपालिकामा कार्यरत ६५६ जना सामुदायिक महिला स्वास्थ्य स्वयंसेविकाहरूलाई स्वास्थ्य सामाग्रीहरू वितरण गरिएको छ। महानगरपालिकाको स्वास्थ्य महाशाखाद्वारा आयोजित स्वास्थ्य सामाग्री वितरण तथा बृहत् भेलामा प्रमुख धनराज आचार्य र उपप्रमुख मञ्जुदेवी गुरुङलगायतले स्वास्थ्य सामाग्रीहरू वितरण गरेका हुन्।

फस्ट एड किट, छाता, लाइट, अत्यावश्यक र बढी प्रयोग हुने औषधिहरूलगायतका सामग्री वितरण गरिएको थियो। नागरिकको स्वास्थ्य सुरक्षाको सवालमा महिला स्वास्थ्य स्वयंसेविकाहरुले गरेको सेवा र खर्चिएको समय उत्तिकै महत्त्वपूर्ण रहेको भन्दै उनीहरूलाई काम गर्न सजिलो होस् भनेर सामग्री वितरण गरिएको नगर प्रमुख आचार्यले बताए। ‘आफ्नो समय नागरिकको जनस्वास्थ्यमा लगाउने गरी विगत लामो समयदेखि यहाँहरू अहोरात्र खटिरहनु भएको छ,’ प्रमुख आचार्यले भने, ‘निस्वार्थ सेवाको भाव सामाजिक रूपमा किट ब्याग बोकेर यहाँहरूले गौरवका साथ देखाउनु भएको छ, यहाँहरूको महानता, समर्पण र सेवा प्रति म नतमस्तक छु। यहाँहरूलाई सजिलो पार्न नगरले प्रयास गरिरहेको छ।’

महानगरको टोलटोलमा पुगेर स्वास्थ्य सचेतनाको जागरण ल्याउने र मानिसहरूलाई आफ्नो स्वास्थ्य प्रति सचेत गराउने स्वास्थ्य स्वयम सेविकाहरूलाई खटाई अनुसारको सेवा सुविधा दिन नसकिएको उल्लेख गर्दै उनले आगामी आर्थिक वर्षबाट यसलाई सम्बोधन गर्न विशेष पहल गरिने बताए। ‘स्वयंसेविकाहरूको सेवा सुविधाका विषयमा हामीले पनि महसुस गरेकै विषय हो,’ उनले थपे, ‘आगामी आवदेखि यसमा थप केही व्यवस्था गर्ने सम्बन्धमा विशेष पहल गरिनेछ।’

नगर उपप्रमुख मन्जुदेवी गुरुङले आधारभूत सेवाको पहुँच नपुगेका दूर दराजमा पुगेर सरकारको उपस्थिति देखाउने स्वयंसेविकाहरूको योगदान उल्लेखनीय रहेको बताइन्। महिला, बालबालिका र वृद्धावृद्धहरुलाई अप्ठ्यारो परेका बेला पहिलो सेवकको रूपमा उपस्थिति जनाउने महिला स्वास्थ्य स्वयंसेविकाहरू आफैमा अनुकरणीय भएको उल्लेख गरिन्। ‘सरकारको तर्फबाट तपाँईहरुलाई जति सम्मान दिनुपर्ने हो, त्यो हुन सकिरहेको छैन,’ उपप्रमुख गुरुङले भनिन्, ‘पोखरा महानगरपालिकाको क्षमताले भ्याएसम्म आगामी बजेटमा तपाँईहरुका समस्याहरू सम्बोधन गर्ने प्रयत्न गरिने छ।’

पोखरा महानगरपालिका-२ का वडाध्यक्ष दिवसमान प्रधानाङ्गले स्वयंसेविकालाई आवश्यक सामाग्रीहरूको व्यवस्था गरिनु पर्ने बताए। उनीहरूलाई आवश्यक सम्पूर्ण प्रकारका सामाग्रीसहित सेवानिवृत्त पश्चात् पाउने उपादानसमेत वृद्धि गर्नु पर्नेमा जोड दिए। यस्तै वडा नं. १७ की वडाअध्यक्ष राधिकाकुमारी शाही योगीले स्वास्थ्य स्वयंसेविकाहरुले टोलटोलमा पुगेर स्वास्थ्य शिक्षाको चेतना अभिवृद्धिमा महत्त्वपूर्ण योगदान गरेको बताए।

महानगरको स्वास्थ्य समितिका उपाध्यक्ष पूर्ण लामाले महानगरद्वारा सञ्चालित स्वास्थ्य संस्थाहरूको सेवा विस्तार र क्षमता अभिवृद्धि आवश्यक रहेको बताए। महानगरद्वारा सञ्चालित अस्पताल, सहरी स्वास्थ्य प्रवर्द्धन केन्द्र, स्वास्थ्य चौकी लगायतको सेवा विस्तार गर्दै ती स्वास्थ्य संस्थाहरू विश्वासिला र भरपर्दो बनाउनु पर्ने बताए। स्वास्थ्य कार्यालय कास्कीका प्रमुख बद्री अर्यालले महिला स्वास्थ्य स्वयंसेविकाहरू केवल व्यक्ति नभएर सरकारको प्रतिनिधिका रूपमा जनताको घरदैलोमा पुग्ने गरेको बताए। देशभरि मातृ शिशु मृत्युदर घटाउने कार्यमा उनीहरूको योगदान महत्त्वपूर्ण रहेको उनले बतए।