सरकार बाघ मारेजसरी उधुम हल्ला गरिरहेको छ : ओली

काठमाडौँ- नेकपा एमालेका अध्यक्ष केपी शर्मा ओलीले नक्कली भुटानी शरणार्थी प्रकरणमा आफूले छानबिन गरेको भनेर बाघ मारेको जसरी हल्ला गरेको आरोप टिप्पणी गरेका छन्। सरकारले नक्कली शरणार्थी प्रकरणलाई ढाकछोपको प्रयास गरेको तर नसकेको उनको टिप्पणी थियो।

आइतबार प्रतिनिधिसभामा आर्थिक वर्ष ०८०/०८१ को नीति तथा कार्यक्रममाथिको छलफलमा सहभागी हुँदै ओलीले उधुम हल्ला आवश्यक नभएको उनको दाबी छ।

‘भुटानी शरणार्थी प्रकरणमा सरकारले छानबिन गर्नुपर्यो।, सन् २०१२ मा केही मान्छे अमेरिका छिरे भन्ने सुन्दैछु त्यसमा सरकारले छानबिन गर्नुपर्यो। सरकार बडा भ्रष्टाचार विरोधी च्याम्पियन आफू भएर आफूले के–के न बाघ मारेको जस्तो उधुम हल्ला गरिरहेको छ,’ ओलीले थपे, ‘गृहमन्त्रीज्यू उधुम हल्ला गरिरहनुभएको छ। यसमा सरकारले जुँगाकमा ताउ लगाउनुपर्ने आवश्यकता देख्दिनँ। यो काण्ड अगाडिबाट चलिरहेको छ। यसमा गत वर्ष नै उजुर परेको रहेछ। किन गुपचुप राखियो? गिरफ्तार गरेका मान्छेलाई सट्याकसुटुक किन छोडियो।’

सन् २०१२ मा दोस्रो पटक संयुक्त प्रमाणीकरण गर्ने भनिएको र त्यही बेला केही मान्छेहरू शरणार्थी बनेर छिरेको कुरा आफूले सुनेको उनको भनाइ थियो। त्यो विषयमा सरकारले छानबिन गर्नुपर्ने उनको माग छ।

नक्कली शरणार्थी प्रकरणमा सरकारले ढाकछोपको प्रयास गरेको तर त्यस्तो प्रयास सफल हुन नसक्ने बताए। ‘जेठमै उजुरी परेको रहेछ। किन गुपचुप राखियो? त्यसबेलै गिरफ्तार परेका रहेछन्। केस दबाउन छुटाइएका रहेछन्,’ उनले थपे, ‘यो पचाउन सक्ने कुरै होइन। यो भुईचाँलो आयो। यो रोक्न सकिँदैनथ्यो।’

आफू सत्तामा रहँदा कुनै गलत काम नगरेको उनको दाबी छ। ‘मेरो समयमा केही पनि गएको छैन। एउटा समिति बनेछ। अध्ययन गर्न भनेर सामाजिक समितिमा राखेको थिएँ। तर त्यसलाई सरकारले फिर्ता पठाएछ। तर पछि कागज फेरिएछ। माथिको कभर चै उही राखियो। तलका व्यक्तिका नामसूची परिवर्तन गरियो।’

कोही पनि दोषी नछुटुन् भन्ने पक्षमा आफू रहेको भएपनि अहिले निर्दोष फसाउने प्रयास भइरहेको आरोप लगाए। ‘अझ भयावह भएर निसक्न्छ। यो ९७५ जनासंग पैसा उठाइएको छ। यो चानचुने कुरा हो र!’ उनले भने।