उपराष्ट्रपति निर्वाचनमा क-कसले गरेनन् मतदान?

उपराष्ट्रपति चुन्न शुक्रबार नयाँ बानेश्वरस्थित संसद भवनको ल्होत्से हल भएको मतदान सम्पन्न भएको छ। बिहान १० बजेदेखि दिउँसो ३ बजेसम्म भएको मतदानमा संघीय संसद्का ३११ र प्रदेश सभा तर्फका ५१८ सांसद्ले मतदान गरे। संघीय संसद्का ३३२ र प्रदेशसभाका ५५० जना मतदाता थिए। तर संघीय संसद्का २१  र प्रदेश सभाका ३२ जना सांसद्ले मत हालेनन्।

संघीय संसद्का १४ जना राप्रपा सांसद्ले मतदान नगरेको निर्वाचन कार्यालयले जानकारी दिएको छ। यस्तै, नेमकिपाका प्रेम सुवालले पनि मतदान गरेनन्। रामचन्द्र पौडेल राष्ट्रपति निर्वाचित भइसकेका छन्। कांग्रेस सांसद् चन्द्र भण्डारी उपचाररत छन्। यस्तै सांसद मनोरमा शेरचन पनि बिरामी रहेकाले अनुपस्थित रहिन्। सांसद सहनाज रहमानको मृत्यु भएको छ।

एमाले सांसद लक्ष्मी महतो कोइरी पनि मतदानमा सहभागी भएनन्। मतदान नगर्ने प्रदेशका सांसदमा राप्रपाका २८ जना, नेमकिपाका ३ जना, जसपाका १ जना छन्।

राप्रपाका संघ र प्रदेशका गरी २८ जना सांसदले पार्टीको नीति अनुरुप मतदान नगरेका हुन्। राप्रपाले राष्ट्रपति निर्वाचनमा पनि मतदान गरेको थिएन। राप्रपाका सांसदले झैं नेमकिपाका सांसदले पनि राष्ट्रपतिको निर्वाचनमा मतदान गरेका थिएनन्।

उपराष्ट्रपतिको निर्वाचनका लागि भएको मतदानको गणना सुरु भएको छ।