आन्दोलनमा होमियो नेकपा एस

काठमाडौँ- नेकपा (एकीकृत समाजवादी)ले आन्दोलनका कार्यक्रम घोषणा गरेको छ। शुक्रबार काठमाडौंमा पत्रकार सम्मेलन गरेर एकीकृत समाजवादीले पहिलो चरणको आन्दोलनका कार्यक्रम घोषणा गरेको हो।

पार्टीका महासचिव तथा केन्द्रीय आन्दोलन संयोजन कमिटीका संयोजक घनश्याम भुसालले समाजवादको तयारी गर्ने उद्देश्य भएका क्रान्तिकारीहरूबीच सहकार्य र एकताको अभियान पनि भएको बताए।

‘यो आन्दोलन राजनीतिलाई सत्ताको खेल वा आगामी निर्वाचनको जोड–घटाउबाट मुक्त गर्न थालिएको आन्दोलन हो,’ उनले पार्टीका माग सुनाउँदै भने, ‘बेरोजगारी र कुशासनविरुद्ध एउटा क्रान्तिकारी पहलकदमी हो र राष्ट्रिय पुँजीको विकास गर्दै समाजवादको तयारी गर्ने उद्देश्य भएका क्रान्तिकारीहरूका बीच सहकार्य र एकताको अभियान हो ।’

उनका अनुसार, पार्टीले उठाएका मागका विषयमा चैत २ देखि ६ गतेसम्म मातहत कमिटीहरूमा छलफल गरिनेछ। चैत ७ देखि १५ गतेसम्म केन्द्रीय तहमा विभिन्न क्षेत्रका संघ संगठन तथा व्यक्तिहरूसँग संवाद तथा सुझाव संकलन गर्ने कार्यक्रम छ। चैत २० गते सरकारलाई ज्ञापनपत्र बुझाउने भुसालले बताए।

यस्तै, चैत मसान्तसम्म प्रदेश र जिल्ला तहमा सार्वजनिक संवाद तथा सुझाव संकलन, वैशाख ५ गते प्रदेश सरकार र जिल्ला प्रशासन कार्यालयमा ज्ञापनपत्र पेस गर्ने कार्यक्रम तय भएको छ। वैशाख १५ गतेसम्म पालिका र वडा तहमा सार्वजनिक संवाद तथा सुझाव संकलन, वैशाख १९ देखि २२ सम्म पालिका र वडा कार्यालयहरूमा ज्ञापन पत्र पेस गर्ने कार्यक्रम रहेको भुसालले बताए। वैशाख २५ गते दोस्रो चरणको कार्यक्रम सार्वजनिक गर्ने उनले जानकारी दिए।

नेकपा (एकीकृत समाजवादी)ले भारतसँगको सन् १९५० को ‘शान्ति तथा मैत्री सन्धि’ खारेज गर्नसमेत माग गरेको छ। ‘हाम्रो भूराजनीति र अहिलेको विश्व राजनीतिका अन्तरविरोधहरूले गर्दा विदेश नीतिमा हामीले विशेष ध्यान दिनुपर्छ,’ एकीकृत समाजवादीले भनेको छ, ‘एकातिर सन् १९५० लगायत असमान सन्धि–सम्झौताहरू खारेज गर्नुपर्नेछ, कालापानी–लिपुलेकसमेत मिचिएको भूमि फिर्ता गरेर देशको सिमानाको रक्षा गर्दै आजको शीतयुद्धउन्मुख अन्तर्राष्ट्रिय परिस्थितिमा हाम्रो स्वाधिनता, स्वतन्त्रता तथा सार्वभौमिकताको रक्षा गर्नुपर्नेछ।’

संयुक्त राष्ट्रसंघको बडापत्र, पञ्चशीलका सिद्धान्त, संविधानअनुसार असंलग्नतामा आधारित समानता तथा आपसी हितका आधारमा विदेश नीतिको प्रभावकारी कार्यान्वयन गर्दै सबैसँग असल सम्बन्ध राख्नुपर्ने प्रस्ताव एकीकृत समाजवादीको छ।