५ महिनापछिको अन्तर्राष्ट्रिय खेलमा नेपालले हरायो कतार

काठमाडौँ- हङकङमा आजबाट सुरु भएको चारदेशीय टी–२०आई सिरिजमा नेपालले विजयी सुरुवात गरेको छ। पहिलो खेलमा नेपालले कतारलाई ८ विकेटले पराजित गर्दै उत्कृष्ट सुरुवात गरेको हो।

कतारले दिएको १५२ रनको लक्ष्य नेपालले १७ ओभरमा पुरा गरेको हो। नेपालका लागि ओपनर कुशल भुर्तेलले १९ बलमा ३८ रन बनाए। उनले ४ चौका र ३ छक्का प्रहार गरे। आसिफ शेखले २१ बलमा ४ छक्कासहित ३३ रनको योगदान दिए।

कप्तान रोहित २९ बलमा २ चौका र १ छक्कासहित २७ रनमा नटआउट रहे। भने बसीर अहमतले ३३ बलमा २ चौकासहित नटआउट ३० रन जोडे। कतारले २० ओभरमा ५ विकेट गुमाएर १ सय ५१ रन जोडेको थियो।

कतारका लागि कप्तान इक्रमउल्लाह खानले सर्वाधिक ५४ रनको योगदान दिए। उनले ५२ बलमा अर्धशतक पूरा गरेका थिए।

नेपालका लागि करण केसी, ललित राजवंशी, सोमपाल कामी, नन्दन यादव र गुलशन झाले १–१ विकेट लिएका थिए।

गत वर्षको अक्टोबरपछि नेपालले पहिलो पटक अन्तर्राष्ट्रिय स्पर्धा गरेको हो। पाँच महिनामा नेपाली क्रिकेटर घरेलु प्रतियोगितामै व्यस्त भएका थिए।

गत पुसमा पहिलो संस्करणको नेपाल प्रिमियर लिग र प्रधानमन्त्री कप एकदिवसीयमा राष्ट्रियस्तरका क्रिकेटरले प्रतिस्पर्धा गरेका थिए।

यी दुईवटा प्रतियोगिताअघि घरेलु खेलाडीले अन्तिमपटक गत नोभेम्बरमा आइसिसी विश्वकप लिग २ प्रतिस्पर्धा गरेका थिए। अमेरिकामा भएको विश्वकप लिग खेलमा नेपालले आयोजक अमेरिका र स्कटल्यान्डविरुद्ध खेलेको थियो। अमेरिकामा नेपालले चारमध्ये दुई खेलमा हार तथा एक खेलमा जित निकालेको थियो । नेपाल र स्कटल्यान्डबिच एक खेल वर्षाका कारण रद्द भएको थियो। अमेरिकाकै भ्रमणमा नेपालले लगातार सात खेलको हार ‘जिंक’ तोडेको थियो।

नेपालले २९ अक्टोबरमा स्कटल्यान्डलाई ५ विकेटले पराजित गरेको थियो।

यो ५ महिनामा नै नेपालले नयाँ मुख्य प्रशिक्षकमा पाएको छ।  अस्ट्रेलियन स्टुअर्टल नयाँ प्रशिक्षक बएका छन्। उनी १३ वैशाखपछि नेपाली टोलीमा आबद्ध हुनेछन् । उनको स्थानमा नेपाली टोलीलाई पूर्वकप्तान ज्ञानेन्द्र मल्लले हेर्नेछन्। मल्लकै प्रशिक्षणमा नेपालले हङकङमा सिरिज खेल्नेछ।