ईभी इकोसिस्टमका लागि तमिलनाडुमा २ खर्ब भारु लगानी गर्दै हुन्डाई

तमिलनाडु- दक्षिण कोरियाली अटो कम्पनी ‘हुन्डाई’ले भारतको तमिलनाडुमा दुई खर्ब लगानी गर्ने भएको छ। सन् २०२३ देखि २०३२ सम्को अवधिमा चरणवद्ध रूपमा उक्त लगानी गरिने हुन्डाई इन्डियाको भनाइ छ। यो लगानी विशेष गरी विद्युतीय सवारी साधनलाई आधुनिकीकरण गर्ने काममा प्रयोग हुने बताइएको छ।

यससम्बन्धी सम्झौतामा हुन्डाइ मोटर इन्डियाका प्रमुख कार्यकारी अधिकृत तथा प्रबन्ध निर्देशक उन्सु किम र तमिलनाडु सरकारको लगानी व्यवस्थापन निकाय गाइडेन्सका प्रमुख कार्यकारी अधिकृत तथा प्रबन्ध निर्देशक भी विष्णुबीच हस्ताक्षर भएको छ। सम्झौतामा हस्ताक्षर भएको समारोहमा तमिलनाडुका मुख्यमन्त्री एमके स्टालीन पनि उपस्थित थिए।

‘हाम्रो दीर्घकालीन दृष्टिकोणको एक भागको रूपमा, हामीले तमिलनाडुलाई भारतमा हुन्डाईको विद्युतीय सवारी उत्पादनको आधारको रूपमा विकास र स्थापना गर्ने योजनालाई अन्तिम रूप दिएका छौं,’ हुन्डाईका उन्सु किमले भने, ‘यसले हामीलाई हाम्रो पोर्टफोलियोलाई सुदृढ गर्न र हाम्रा गाडीहरूमा उत्कृष्ट सुविधाहरू र प्रविधिहरू प्रदान गर्न मद्दत गर्नेछ जसले हाम्रो ग्राहकको आकांक्षालाई पूरा गर्नेछ।’

हुन्डाईले वार्षिक रूपमा एक लाख ७८ हजार ब्याट्री प्याक एसेम्बली इकाई स्थापना गर्नेछ। यसका साथै ५ वर्षको अवधिमा प्रमुख राजमार्गहरूमा प्रमुख स्थानहरूमा एक सय चार्जिङ स्टेसनहरू स्थापना गर्नेछ। यसमा ५ डुअल अल्ट्रा-फास्ट चार्जिङ स्टेसनहरू, १० सिंगल फास्ट चार्जिङ स्टेसनहरू र ८६ एकल फास्ट चार्जिङ स्टेसनहरू समावेश छन्।

हुन्डाई मोटर इन्डियाले कुल उत्पादन मात्रालाई वार्षिक ८ लाख ५० हजार युनिटमा पुर्‍याउनेछ र श्रीपेरुम्बुदुरमा रहेको आफ्नो कारखानाबाट नयाँ विद्युतीय र आईसीई सवारी साधनहरू उत्पादन गर्नेछ।