सरकारको नीति तथा कार्यक्रममाथि बहस गर्दै दुवै सदन

काठमाडौँ- प्रतिनिधिसभा आगामी आर्थिक वर्ष २०८२/८३ को सरकारको वार्षिक नीति तथा कार्यक्रममाथि सोमवारदेखि छलफल प्रारम्भ हुँदैछ।

प्रधानमन्त्री केपी शर्मा ओलीले प्रतिनिधि सभाको बैठकमा राष्ट्रपति रामचन्द्र पौडेलले यही वैशाख १९ गते शुक्रवार सङ्घीय संसद्को दुवै सदनको संयुक्त बैठकमा वाचन गरेको नीति तथा कार्यक्रममाथि छलफल गरियोस् भनी प्रस्ताव पेस गरेपछि दुवै सदनले बहस सुरु गर्नेछन्।

आगामी आर्थिक वर्षको सरकारको उक्त नीति तथा कार्यक्रममाथि सदस्यबाट प्राप्त संशोधन प्रस्तुत हुने र सम्बोधनमाथि छलफल गरिने सङ्घीय संसद्का महासचिव पद्मप्रसाद पाण्डेयले जानकारी दिए।

कार्यसूचीअनुसार, त्यसका लागि प्रतिनिधिसभाको बैठक सोमवार बिहान ११ बजे बस्नेछ।

राष्ट्रियसभामा भने सरकारको उक्त नीति तथा कार्यक्रममाथिको छलफल भने आइतबारबाटै प्रारम्भ भइसकेको छ। बैठकमा पनि उक्त कार्यक्रममाथि छलफल हुनेछ। राष्ट्रियसभाको बैठक भने दिउँसो १ः १५ बजे बस्ने कार्यसूची छ।