सुनसरी प्रशासनले बाँड्यो ९ महिनामा १२ हजार बढी नयाँ नागरिकता

सुनसरी– जिल्ला प्रशासन कार्यालय सुनसरीले चालू आर्थिक वर्षको ९ महिनामा १२ हजार १७७ थान नयाँ नागरिकता जारी गरेको छ। कार्यालयले चालू आर्थिक वर्षको साउनदेखि चैत मसान्तसम्म सो संख्यामा नयाँ नागरिकता जारी गरेको सुनसरीका प्रमुख जिल्ला अधिकारी हुमकला पाण्डेले जानकारी दिइन्।

कार्यालयले सोही अवधिमा ११ हजार ३३९ थान नागरिकताको प्रतिलिपि वितरण गरेको छ। चालू आवको पहिलो ९ महिनामा नयाँ नागरिकता र नागरिकताका प्रतिलिपि गरी कुल २३ हजार ५१६ थान नागरिकता वितरण भएको प्रजिअ पाण्डेले बताइन्। यो अवधिमा ३८५ वटा मुद्दा दर्ता भएका छन् भने २४४ मुद्दा फस्र्योट भएको उनले जानकारी दिइन्।

प्रशासनले जारी गरेको प्रगति विवरणानुसार जिल्ला प्रशासन कार्यालयमार्फत पछिल्लो ९ महिने अवधिमा ११ हजार ३०९ वटा राहदानी वितरण गरेको छ। त्यसैगरी राहदानीका लागि १६ हजार ९२ थान निवेदन दर्ता भएका छन् भने ६६ वटा राहदानी विभागमा सिफारिस गरिएको छ।

सोही अवधिमा प्रशासनमार्फत जम्मा रु २० लाख १३ हजार ७५० बराबरको राहत वितरण गरेको छ भने असहाय एवं विपन्न परिवारका ५३५ जनालाई कम्बल वितरण गरेको उनले बताइन्। सोही अवधिमा २४ वटा बजार अनुगमन, १३ वटा सार्वजनिक निकायको अनुगमन, सुरक्षा निकाय ३९ र जिल्ला सुरक्षा समिति ३२ वटा अनुगमन गरेको प्रजिअ पाण्डेको भनाइ छ।

विकास आयोजनातर्फको अनुगमन शून्य छ भने सुरक्षा निकायको ३९ पटक अनुगमन गरिएको छ। यही अवधिमा जिल्लामा जम्मा ११२ नयाँ संस्था दर्ता भएका छन् भने ४२६ वटा संस्था नवीकरण भएको प्रजिअ पाण्डेले बताइन्।