संसद् बैठकमा बोल्न नपाएपछि गृहमन्त्रीले बोलाए पत्रकार सम्मेलन

काठमाडौँ- गृहमन्त्री रमेश लेखकले प्रतिनिधि सभा बैठकमा कुरा राख्न नपाएपछि पत्रकार सम्मेलन बोलाएका छन्।

संघीय संसद् भवनको ल्होत्से हलमा बुधवार साँझ ५ बजेका लागि पत्रकार सम्मेलन बोलाइएको गृहमन्त्री लेखकको सचिवालयले जानकारी दिएको हो। संसद बैठकमा आफूले कुरा राख्ने वातावरण नबनेकाले पत्रकार सम्मेलन आयोजना गरिएको गृहमन्त्री लेखकको सचिवालयका लोकेन्द्र भट्टले जानकारी दिए।

प्रतिनिधि सभा बैठकमा आफ्ना कुराहरू राख्नका लागि उनले समय माग गरेका थिए। सभामुखले पनि उनलाई कुरा राख्नका लागि समय दिएका थिए। तर प्रतिपक्षीहरुको अवरोधका कारण उनले बोल्न पाएनन्।

भिजिट भिसामा विदेश जाने नेपालीसँग चर्को घुस असुली गरी बाँडफाँट गर्ने गरेको आरोप गृहमन्त्री लेखकमाथि लागेको छ। त्रिभूवन अन्तर्राष्ट्रिय विमानस्थल अध्यागमन कार्यालयका प्रमुख तीर्थराज भट्टराईलाई अख्तियार दुरुपयोग अनुसन्धान आयोगले पक्राउ गरी कारवाहीको प्रक्रिया अघि बढाएपछि यो विषय फेरि चर्चामा आएको हो।

यसमा गृहमन्त्रीको समेत मिलेमतो रहेकाले उनले राजीनामा दिनुपर्ने र उनीमाथि छानबिन गर्नका लागि समिति बनाउनुपर्ने माग रास्वपालगायतका दलले गर्दै आएका छन्।