गृहमन्त्रीले राजीनामा दिनुपर्ने मागमा रास्वपा कायमै, प्रचण्डलाई फकाउँदै ओली-देउवा

राष्ट्रिय स्वतन्त्र पार्टी(रास्वपा)ले भिजिट भिसा प्रकरणमा छानबिनका लागि गृहमन्त्रीले राजीनामा दिएर मार्गप्रशस्त गर्नुपर्ने अडान कायमै राख्ने निर्णय गरेको छ।

पार्टी कार्यालय बनस्थलीमा बसेको रास्वपा संसदीय दलको बैठकले उच्चस्तरीय छानबिन आयोगमार्फत गृहमन्त्रीमाथि अनुसन्धान हुनुपर्ने र त्यसअघि गृहमन्त्रीले मार्गप्रसस्त गर्नुपर्ने अडान कायमै राख्ने निर्णय गरेको हो।

गृहमन्त्रीमाथि प्रश्न उठेकाले गृहमन्त्रीले नभइ सरकारको अभिभावकको रुपमा रहेका प्रधानमन्त्री केपी ओलीले सदनमा जवाफ दिनुपर्ने बैठकको निष्कर्ष रहेको रास्वपा कार्यवहाक प्रवक्ता मनिष झाले जानकारी दिए।

‘भिजिट भिसा प्रकरणमा रास्वपा कुनै एक व्यक्तिको पछि लागेको नभई समग्र बेतिथिलाई अन्त्य गर्नुपर्छ भन्नेमा अडिग छ,’ उनले भने, ‘प्रधानमन्त्री केपी ओलीले सदनमा जवाफ दिनुपर्ने बैठकको निष्कर्ष छ।’

सोमबार नै बसेको रास्वपा सचिवालय बैठकले भिजिट भिसा प्रकरणमा सदनमा सशक्त रुपमा प्रस्तुत हुन संसदीय दललाई निर्देशन दिएको थियो।

सदनको गतिरोध अन्त्य गर्न प्रधानमन्त्री केपी शर्मा ओलीले भने प्रतिपक्षी दल माओवादी केन्द्रलाई फकाउन थालेको छ।

सोमबार प्रधानमन्त्री कार्यालय सिंहदरबारमा प्रधानमन्त्री केपी शर्मा ओलीले माओवादी केन्द्रका अध्यक्ष प्रचण्डलाई बोलाएर सदनको गतिरोध अन्त्य गर्दै सहज रुपमा सदन चल्ने वातावरण बनाउन माओवादीसमक्ष आग्रह गरेका थिए। उक्त कुराकानीमा कांग्रेस सभापति शेरबहादुर देउवा पनि सहभागी थिए।

माओवादी नेताले भिजिट भिसा प्रकरणमा गृहमन्त्रीको राजीनामा आउनुपर्ने आफूहरुको अडान कायम रहेको जवाफ दिएको बताइएको छ।

छलफलपछि नेकपा माओवादी केन्द्रका प्रमुख सचेतक हितराज पाण्डेले संसद् खोलेर अघि बढ्नुपर्ने प्रस्ताव सत्तापक्ष नेताहरुबाट आएको बताए। उनका अनुसार समग्र संसदको गतिरोधका बारेमा छलफल भएपनि कुनै निष्कर्ष निस्कन सकेन।

‘भिजिट भिसा प्रकरणमा गडबड भइरहेकाले अनुसन्धान गर्नका गृहमन्त्रीले मार्गप्रसस्त गर्नुपर्ने हाम्रो अडान कायमै छ,’ उनले भने।

बैठकमा राजावादीहरूको आन्दोलनका विषयमा पनि कुराकानी भएको थियो।

प्रधानमन्त्रीका सल्लाहकार अग्नि खरेलले मुलुकको संविधानलाई चूनौती दिने गरी राजावादीका नाममा भएको गतिविधि राजनीतिक रुपमा संयमतापूर्वक सामना गर्दै अघि बढ्ने विषयमा तीनै दलबीच स्पष्ट र एकै दृष्टिकोण रहेको बताएका छन्।

प्रधानमन्त्री तथा मन्त्रिपरिषद्को कार्यालय, सिंहदरबारमा भएको छलफलमा प्रचण्डका लागि पनि विशेष कुर्सीको व्यवस्था गरिएको थियो। नेपाली कांग्रेसका सभापति देउवा र प्रचण्डका लागि समान हैसियतको कुर्सी राखिएको छ भने प्रधानमन्त्री ओलीका लागि अझ विशेष कुर्सी राखिएको थियो।

यसअघि ओली र देउवा भेट हुँदा समान प्रकृतिको कुर्सीमा बस्ने गरेका थिए। ओली पछिल्लो पटक प्रधानमन्त्री भएयता प्रचण्ड बालुवाटार जाँदा उनका लागि विशेष कुर्सीको व्यवस्था गर्ने गरिएको थिएन।

गृहमन्त्री रमेश लेखकको राजीनामा माग गर्दै माओवादीसहितका दलले सदनमा अवरोध गरिरहेका बेला प्रचण्डलाई विशेष कुर्सीमा राखेर माओवादीलाई लचक बनाउने यत्न भएको हो।

भिजिट भिसा प्रकरणमा विदेश जाने नेपालीसँग दिनहुँ चर्को घुस रकम असुली गर्ने गरिएको र त्यसमा गृहमन्त्री समेत संलग्न रहेको आरोप लागेको छ।

नेपाली कांग्रेसका केही नेताहरूले गृहमन्त्रीलाई राजीनामा दिन सुझाव दिए पनि देउवाले भने राजीनामा दिन नपर्ने अडान लिएका छन्।

ओलीले पनि गृहमन्त्रीले राजीनामा दिन नपर्ने बताइसकेका छन्।