बालेनले ६ महिनापछि बोलाएको बैठक पनि बस्न सकेन, प्रवक्ता भन्छन्- बैठकको टुंगो छैन

काठमाडौँ- काठमाडौँ महानगरपालिकाका मेयर बालेन्द्र साहले सोमबारका लागि बोलाएको कार्यपालिका बैठक फेरि अन्यौलमा परेको छ। ६ महिनापछि मेयर बालेनले कार्यपालिका बैठक बोलाएको भएपनि न त स्थगित भएको सूचना सार्वजनिक गरियो न त बैठक नै बस्न सक्यो।

महानगरभित्रको आन्तरिक कारणले बैठक बस्न नसकेको काठमाडौँ महानगरपालिका प्रवक्ता नवीन मानन्धरले जानकारी दिए। ‘महानगरको कार्यपालिका बैठक सोमबार बस्ने भनिएको थियो,’ नेपाल क्लिक्ससँग कुराकानी गर्दै प्रवक्ता मानन्धरले भने, ‘आन्तरिक विषय व्यवस्थापन भइनसकेका कारण बैठक बस्न नसकेको हो।’

स्थानीय सरकार सञ्चालन ऐन, २०७४ अनुसार नगरपालिका कार्यपालिकाको बैठक महिनाको एक पटक बस्ने व्यवस्था छ। तर ऐनको उक्त व्यवस्थालाई मेयर बालेनले बेवास्ता गर्दै आएका छन्।

अब बैठक कहिले बस्छ त? प्रवक्ता मानन्धर भन्छन्- ‘कार्यपालिका बैठक यसै दिन बस्छ भन्ने अवस्था छैन, बैठकको बस्ने कुनै टुङ्गो छैन।’

स्थानीय सरकार सञ्चालन ऐन २०७४ प्रत्येक स्थानीय तहले असार १० गतेसम्ममा बजेट ल्याउनुपर्ने कानुनी बाध्यता छ। महानगरको बजेट नगरसभामा पेस गर्नुपर्ने हुन्छ। तर त्यसको तयारीमा जुट्नुपर्ने मेयर साह भने कार्यपालिका र नगरसभा दुवै बैठक छल्दै हिँड्न थालेपछि महानगरपालिकाका काम प्रभावित भएका छन्।

मेयर साहले बैठक छल्न थालेको भन्दै आलोचना पनि जनप्रतिनिधिबाट नै हुन थालेको छ। स्थानीय सरकार सञ्चालन ऐनमै नगरसभा तथा कार्यपालिकाको बैठक नगरप्रमुखले बोलाउने र बैठकको अध्यक्षता गर्ने प्रावधान छ।

कार्यपालिका बैठक बस्न नसकेको लामो समय बितेपछि महानगर कार्यपालिकाका सदस्यहरूले जेठ १२ मा मेयर शाह पत्र लेखी बैठक बोलाउन माग गरेका थिए। तर त्यसलाई पनि मेयर शाहले बेवास्ता गरिदिएका छन्।