पेनाल्टीमा पुगेर हार्‍यो स्पेन, पोर्चुगलले जित्यो नेसन्स लिगको उपाधि

काठमाडौँ- पेनाल्टी सुटआउटमा ५–३ गोल अन्तरले स्पेनलाई पराजित गर्दै पोर्चुगलले उपाधि जितेको छ।

आइतबार म्युनिखमा भएको फाइनलमा निर्धारित समय २–२ को बराबरीपछि नतिजाका लागि पेनाल्टी प्रतिस्पर्धा गर्नुपरेको थियो।

योसँगै पोर्चुगलले दोस्रो पटक नेसन्स लिगको उपाधि जितेको हो।

अल्भारो मोराटाको निर्णायक पेनाल्टी प्रहारलाई गोलरक्षक डिएगो कोस्टाले रोकेपछि रुबेन नेभ्सले गोल गर्दै पोर्चुगललाई उपाधि दिलाए।

निर्धारित समयमा पोर्चुगल दुईपटक पछाडि परे पनि बराबरीमा फर्किन सफल भयो। मार्टिन जुबिमेन्डीले २१औँ मिनेटमा गोल गरी स्पेनलाई अग्रता दिलाएका थिए। तर, ५ मिनेटपछि नुनो मेन्डेसले उत्कृष्ट गोल गर्दै खेललाई १–१ को बराबरीमा पुर्‍याएका थिए।

पहिलो हाफमा स्पेनका मिकेल ओयार्जाबालले गोल गर्दै २–१ को स्थितिमा पुर्‍याए। ओयार्जाबालको यो गोलले स्पेनलाई बलियो अवस्थामा पुर्‍याएको थियो।

तर, ६१औँ मिनेटमा क्रिस्टियानो रोनाल्डोले गोल गर्दै पोर्चुगललाई २–२ को बराबरीमा ल्याए। निर्धारित समयमा थप गोल नहुँदा खेल अतिरिक्त समयमा पुग्यो। अतिरिक्त समयमा पनि दुवै टिमले गोल गर्न नसक्दा खेल पेनाल्टी सुटआउटसम्म पुगेको थियो।

पेनाल्टी सुटआउटमा गोन्कालो रामोस, भितिन्हा, ब्रुनो फर्नान्डेस र नुनो मेन्डेसले गोल गरे। स्पेनका मोराटाको प्रहार गोलरक्षक कोस्टाले बचाए।

अन्ततः रुबेन नाभास निर्णायक पेनाल्टी गोल गर्दै पोर्चुगललाई उपाधि दिलाए। यो जितसँगै पोर्चुगल दुईपटक नेसन्स लिग जित्ने पहिलो टोली बनेको छ। यसअघि सन् २००४ को युरोमा पोर्चुगलले स्पेनलाई १–० ले हराउँदै प्रतियोगिताबाट बाहिर निकालेको थियो।