समीक्षा र एलिनाले किन भेटे गृहमन्त्री?

काठमाडौँ- गायिकाद्वय एलिना चौहान र समीक्षा अधिकारीले गृहमन्त्री रमेश लेखकलाई भेटेका छन्। सामाजिक सञ्जालमार्फत आफ्नो चरित्र हत्या भएको भन्दै उनीहरूले गृहमन्त्रीलाई भेटेर ध्यानाकर्षण गराएका हुन्।

एलिनाले सामाजिक सञ्जालमा स्टाटस लेख्दै यसबारे जानकारी दिएकी हुन्। लेखकसँगको तस्बिर राख्दै सहयोगका लागि धन्यवाद समेत दिएकी छिन्।

व्यक्तिगत जीवनमा आँच पुर्‍याउने, गालीगलौज र चरित्र हत्या जस्ता कार्यहरू सह्य नभएको समेत उनले उल्लेख गरेकी छिन्। आत्मसम्मानको रक्षा गर्न बाध्य भएर कानुनी प्रक्रिया अघि बढाएको समेत उनको भनाइ छ।

केही दिनदेखि यी दुवैले आफूलाई गालिगलौच गर्नेको प्रोफाइल सामाजिक सञ्जालमार्फत सार्वजनिक गरिरहेकी छिन्। एलिना र समीक्षाले गालीगलौज गर्नेहरुको प्रोफाइल सार्वजनिक गर्ने हिम्मत गरेको भन्दै प्रधानमन्त्री केपी शर्मा ओलीले पनि उनीहरुको प्रशंशा गरेका थिए।

यस्तो छ एलिनाको स्टाटस
म यहाँसम्म तपाईंहरूको माया र साथले आइपुगेकी हुँ। तपाईंहरूको समर्थन नै मेरो आत्मबल हो। तर सबैले सधैं राम्रै सोचून् भन्ने अपेक्षा गर्न सकिन्न, त्यो स्वाभाविक हो। तर जब कुराहरू व्यक्तिगत जीवनमा आच पुर्‍याउने तहमा पुग्छन्, गालीगलौज र चरित्र हत्या जस्ता कार्यहरू भइरहन्छन्, त्यो सह्य हुँदैन।

जसले यस्ता कुरा गरिरहेका छन्, ती मेरो फ्यान होइनन् — ती त मेरो मन दुखाउन चाहने मात्र हुन्। त्यसैले आत्म-सम्मानको रक्षा गर्न बाध्य भई मैले कानुनी प्रक्रिया अघि बढाएकी छु। यो कुनै रिस वा घृणाले होइन, आफ्नो अस्तित्वको सुरक्षा गर्ने अधिकारले उठाइएको कदम हो।

यस विषयमा आवश्यक सहयोग प्रदान गर्नु भएकोमा माननीय गृहमन्त्री श्री रमेश लेखकज्यूलाई विशेष धन्यवाद व्यक्त गर्न चाहन्छु। तपाईंहरूको साथ र सद्भावनाले मलाई अझ अघि बढ्ने हिम्मत दिएको छ।