१६ जना बेपत्ता घटनामा जोडिए यस्ता रहस्य, सिन्धुलीदेखि रामेछापसम्मै खोजी

काठमाडौँ- सिन्धुलीको गोलन्जोर गाउँपालिका-६ का एकै परिवारका १६ जना सम्पर्कविहीन बनेपछि खोजी तीव्र पारिएको छ।

उनीहरूको अन्तिम मोबाइल लोकेसन रामेछापको सिमन्दीछाप भन्ने ठाउँमा ट्र्याक गरिएकाले दुवै जिल्लामा खोजी तीव्र पारिएको दुवै जिल्लाका प्रहरीले जानकारी दिएका छन्। बेपत्ता परिवारका सदस्यको मोबाइल अफ हुनुअघिको लोकेसन पत्ता लागेको हो।

सिमन्दीछाप क्षेत्रको टावरबाट सिन्धुलीमा उनीहरुको घर भएको क्षेत्रमा कभरेज गर्ने भएकाले उनीहरू रामेछाप नै पुगेका हुन् भन्नेमा प्रहरी अझसम्म विश्वस्त छैन।

जिल्ला प्रहरी कार्यालय रामेछापका डीएसपी भोलाकुमार भट्टले उनीहरूको खोजी रामेछापमा पनि तीव्र पारिएको जानकारी दिए। रामेछाप नगरपालिकाको ८ र ९ मा प्रत्येक घरमा प्रहरी पुगेर खोजी कार्य भइरहेको भट्टको भनाइ छ।

सम्पर्कविहीनहरू हायू परिवारका व्यक्ति हुन्। ‘हामीले हायु बस्ती भएका रामेछापका स्थानमा पनि खोजी गर्‍यौं। तर भेटिएको छैन। अन्य ठाउँमा पनि खोजी गर्दैछौं,’ भट्टले भने।

गोलन्जोर गाउँपालिका-६ वडाध्यक्ष रवीन श्रेष्ठका अनुसार उनीहरूको घर एकान्तमा छ। एकान्तमा घर भएका कारण उनीहरू दुई दिनअघि नै बेपत्ता भएपनि ढिलो गरी जानकारी भएको हो।

गोलन्जोर गाउँपालिका–६ स्थित छेत्पा नजिक भण्डास बिप्पर कटेरी भन्ने ठाउँमा बसोबास गर्दै आएको उक्त परिवारकी घरमूली उर्मिला हायू हुन्। उनको १८ जनाको परिवार छ। दुई जना घरबाहिर छ। बाँकी १६ जना बेपत्ताको सूचीमा छन्। उर्मिलासहित उनका ६ छोरा, एक बुहारी, ६ छोरी, एक ज्वाइँ र एक नातिनी छन्।

हायू जातिलाई सरकारले सीमान्तकृत समुदायमा सूचीकृत गरेको छ। उनीहरुलाई सरकारले मासिक ३ हजार ९९० रुपैयाँ भत्ता पनि दिँदै आएको छ। पछिल्लो तीन महिनाको भत्ता उनीहरूले बिहीवार लिएका थिए। परिवारका १८ जना सदस्यको २ लाख १५ हजार ४६० रुपैँया सामाजिक भत्ता बुझे। त्यसपछि उर्मिलाको परिवार सम्पर्कविहीन भएको देखिएको वडाध्यक्ष श्रेष्ठले बताए।

हायू परिवारले गाइवस्तु पनि पालेका थिए। उनीहरूको गाइवस्तुको गोठ छिमेकीको घर नजिकै थियो। गोठमा बाँधेको पाडोलाई तीन दिनदेखि घाँसपानी हाल्न कोही नआएपछि सोमवार छिमेकीहरु घरसम्म पुगेका थिए। घरमा कोही थिएन। यसपछि मात्र प्रहरीले १६ जनाको परिवार बेपत्ता भएको सूचना पाएको हो।

हायुको घरको भान्सामा आगो लागेर सामान्य क्षति भएको छ। भान्सामा सुँगुरको मासु फेला परेको छ। घरपालुवा जनावर भैँसी, बाख्रा, कुखुरा भने अलपत्र अवस्थामा थिए। उनीहरू शुक्रबारबाट बेपत्ता भएको वडाध्यक्ष श्रेष्ठको अनुमान छ।

प्रहरीका अनुसार घर नजिकैको छाप्रोमा पनि आगो लागेको देखिएको छ। त्यसपछि निभाइएको जस्तो पनि छ। काठहरू डढेका छन्। केही लुगाहरू झुन्डिएको देखिन्छ। पकाउने भाँडाहरू पनि घर बाहिरै देखिन्छ। तर जस्ताले छाएको हायुको घरमा भने कोही छैनन्।

जिल्ला प्रहरी कार्यालय सिन्धुलीका एसपी लालध्वज सुवेदीकाअनुसार बेपत्ता परिवारले गत बिहीबार (८ साउन)मा घरमै सुँगुर काटेर खाएको थियो। ‘गाउँलेको भनाइअनुसार बिहीबार सुँगुर काटेर खाएको बुझिएको छ। त्यसपछि उनीहरू बेपत्ता छन्। खोजी जारी छ,’ एसपी सुवेदीले भने।

उर्मिलाका श्रीमान् सने हायू तीन वर्षअघि बेपत्ता भएका थिए। तर पछि जंगलमा उनको हाडखोर भेटिएको स्थानीयको भनाइ छ। उनीहरूको परिवारले ऋण पनि लिएको स्थानीयको भनाइ छ। तर केकति ऋण कोसँग लिएका थिए भन्ने खुलेकोछैन। यीलगायतका विषयले घटना थप रहस्यमय बनेको छ।

स्थानीयबासी तथा शिक्षक सुमन कोइरालाका अनुसार सने हायूको हाडखोर केही महिनापछि जंगलमा भेटिएको थियो।

यी हु्न बेपत्ताहरू