नक्कली शरणार्थी प्रकरण : १८ जनाकै बयान सकियो

काठमाडौँ-  नक्कली भुटानी शरणार्थी प्रकरणका आरोपित पूर्वउपप्रधानमन्त्री टोपबहादुर रायमाझी र पूर्वगृहमन्त्री बालकृष्ण खाणसहित १८ जनाकै बयान सकिएको छ। शुक्रबार खाणसहित तीन जनाको बयान लिने काम सम्पन्न भएपछि पक्राउ परेका सबैको बयान सकिएको हो।

शुक्रबार बिहान ११ बजेदेखि पूर्वगृहमन्त्री खाण, भुटानी शरणार्थीका नेता टेकनाथ रिजाल तथा हरिभक्त महर्जनको बयान सुरु भएको जिल्ला अदालत काठमाडौँका सूचना अधिकारी दीपक दाहालले जानकारी दिए। उनका अनुसार उक्त प्रकरणमा मुछिएका पूर्वउपप्रधानमन्त्री टोपबहादुर रायमाझी, पूर्वसांसद आङटावा शेर्पा र हज कमिटीका अध्यक्ष शमशेर मियाँको बिहीबार बयान सकिएको थियो।

‘यो प्रकरणमा मुछिएकाहरुको बयान यही जेठ १२ गतेदेखि सुरु गरिएको थियो। तीन जनाको बयान दिए। पक्राउ परेका १८ जनाकै बयान सकिएको छ,’ उनले भने। नक्कली भुटानी शरणार्थी प्रकरणका आरोपितमध्ये १८ जना पक्राउ परेका छन् भने १२ जना अझै फरार रहेको जिल्ला प्रहरी परिसर काठमाडौँले जनाएको छ।

आइतबारदेखि यो प्रकरणमा थुनछेक बहस सुरु हुनेछ। थुनछेक बहस सकिएपछि आरोपितलाई साधारण तारेखमा वा धरौटीमा छोड्ने वा पूर्पक्षका क्रममा कारागार पठाउने विषयमा टुंगो लाग्नेछ।

भुटानी शरणार्थी प्रकरणमा ३० जनाविरुद्ध जिल्ला सरकारी वकिलको कार्यालयले ठगी, संगठित अपराध, किर्ते र राज्यविरुद्धको अपराधको कसुरमा कारबाहीको माग गर्दै जेठ १० मा मुद्दा दायर गरेको थियो। यसपछि पनि २०७९ चैत १२ मा तीन जनालाई पक्राउ परेका थिए।

अनुसन्धानका क्रममा पूर्व उपप्रधानमन्त्री एवं एमाले सांसद टोपबहादुर रायमाझी, पूर्वगृहमन्त्री बालकृष्ण खाण, नेपाल सरकारका सचिव टेकनारायण पाण्डे, तत्कालीन गृहमन्त्री रामबहादुर थापाका सुरक्षा सल्लाहकार इन्द्रजित राई, भुटानी शरणार्थी नेता टेकनाथ रिजालसहित १६ जना पक्राउ परेका थिए।

यो गिरोहका नाइके केशव दुलाल, सानु भण्डारी, कांग्रेसका पूर्व सांसद आङटावा शेर्पा, नेपाल हज समितिका अध्यक्ष शमशेर मियाँ, पूर्व उपप्रधानमन्त्री रायमाझीका छोरा सन्दीप, गिरोहका सदस्यहरू सागर राई, टंक गुरुङ, रामशरण केसी, खाण गृहमन्त्री हुँदा उनका स्वकीय सचिव रहेका नरेन्द्र केसी र गोविन्द चौधरी अनुसन्धानकै क्रममा पक्राउ परेका थिए।

यो प्रकरणमा २८ करोड ८१ लाख रुपैयाँ ठगी भएको भन्दै सोही रकमलाई बिगो बनाएर मुद्दा दायर गरिएको छ। बिगो असुली, ठगिएको रकम फिर्ता र कैद सजाय मागदाबीसहित मुद्दा दर्ता भएको थियो।

यो मुद्दामा केशव तुलाधार, अशोक पोखरेल, धिरेन राई, दीपाञ्जली हुमागाईं, इन्द्रजितका छोरा निरज राई, रामबहादुर थापा बादलका छोरा प्रतीक थापा, राजेश अर्याल, मोहनराज राई, आशlष बुढाथोकी, बिनिता सामदेव लिम्बू, निरञ्जनकुमार खरेल र सुनिल बुढाथोकी फरार छन्। अरु तीन जना फरारको विस्तृत हुलिया नखुलेका कारण उनीहरूलाई भने प्रतिवादी बनाइएको छैन।