रास्वपा नेता पाँडेविरुद्ध मुद्दा दर्ता, महिलालाई पठाएका थिए यस्तो म्यासेज

काठमाडौँ। जिल्ला सरकारी वकिलको कार्यालय काठमाडौँले राष्ट्रिय स्वतन्त्र पार्टी (रास्वपा) का केन्द्रीय सदस्य डा अरनिको पाँडेविरुद्ध मुद्दा दर्ता गरेको छ। शुक्रबार जिल्ला अदालत काठमाडौँमा पाँडेविरुद्ध विद्युतीय कारोबार ऐन अन्तर्गत मुद्दा दर्ता भएको हो।

प्रहरीको अनुसन्धान प्रतिवेदनका आधारमा पाँडेविरुद्ध मुद्दा दर्ता भएपछि आजै न्यायाधीश ध्रुवराज कार्कीको इजलासमा बयानसमेत सुरु भएको छ। बयानपछि थुनछेक बहस हुनेछ। थुनछेकपछि मात्रै पुर्पक्षका लागि कारागार पठाउने, साधारण तारेखमा छाड्ने वा धरौटीमा छाड्ने भनेर आदेश आउने छ।

पाँडेविरुद्ध बेलायत बस्ने नाम परिवर्तित साइबर ब्युरो १३ ले जाहेरी दर्ता गरेकी थिइन्। उनले आफ्नो छोरालाई विज्ञान अध्ययनमा रुचि भएकाले अन्तर्राष्ट्रिय एकीकृत पर्वतीय विकास केन्द्रका कर्मचारी र शिक्षा विज्ञसमेत रहेकाले बुझ्नका लागि म्यासेज गरेकोमा पाँडेले ह्वाट्सएप र इमेलमार्फत् म्यासेज पठाइ मानसिक यातना दिने, अपमान गर्ने लगायतको कार्य गरेको आरोप ती महिलाको छ।

पाँडेले मेलमा ‘तिमी एक बेश्या हौ, मलाई तिमीसँग सुत्न घृणा लाग्नेछ’लगायतको मेल गरेको र ‘तिम्रो श्रीमानले तिमीलाई छाडेको हो? किन ?’ लगायतको म्यासेज गरेको भनी महिलाले जाहेरीमा उल्लेख गरेकी छन्।

प्रहरीसँगको बयानका क्रममा पाँडेले उक्त म्यासेज र मेल आफैँले पठाएको हुनसक्ने र ती महिलासँग आफ्नो श्रीमतीको माध्यमबाट चिनजान भएको बताएका छन्। महिलाले एकोहोरो एकतर्फी आफूसँग आशक्ति राख्ने गरेको बताएका छन्। ती महिलाले आफू नेपाल आउन लागेको बताएर श्रीमती घरमा भए नभएको सोधी भेटौँ भनेको बयानका क्रममा पाँडेले बताएका छन्। दाँतमा दुखाइ भएका बेला के कस्तो म्यासेज लेखी पठाएँ भनेर आफूलाई याद नभएको दाबी उनले गरेका छन्।