रास्वपाले मतदानबाट उम्मेदवार छान्यो, तर मत परिणाम सार्वजनिक गरेन

काठमाडौँ। रुपन्देही–३ मा आगामी कात्तिक ३ गते हुने उपनिर्वाचनका लागि राष्ट्रिय स्वतन्त्र पार्टी (रास्वपा)ले डा लेखजंग थापालाई उम्मेदवारको रूपमा चयन गरेको छ। मतदानबाट उम्मेदवार छनोट गरेको भनिए पनि छनोट प्रक्रियाको मत परिणाम भने अहिलेसम्म सार्वजनिक गरिएको छैन। पार्टीले मतदातामार्फत उम्मेदवार चयन गर्ने अभ्यासलाई ‘नयाँ प्रयोग’ भनेको छ, तर परिणाम सार्वजनिक नगरेपछि पारदर्शिताको सवालमा प्रश्न उठेको छ।

रास्वपाको सचिवालय बैठकबाट निर्णय भइसकेपछि तीन घण्टापछि मात्र उम्मेदवारको नाम घोषणा गरिएको थियो। यसपटक पार्टीले मिश्रित मोडेलमा प्रारम्भिक मतदान र मूल्याङ्कन संयोजन गरेर उम्मेदवार चयन प्रक्रिया अघि बढाएको हो। तर, नौ जना प्रतिस्पर्धी उम्मेदवारहरूबीच कसले कति मत पाए भन्ने विवरण सार्वजनिक नगरिएको विषयमा आन्तरिक र बाह्य आलोचना बढ्दै गएको छ।

पार्टीले यसपटक प्रारम्भिक निर्वाचनसँगै नेतृत्वद्वारा गरिने मूल्याङ्कन, लिडरसिप एकेडेमीको राय, र समावेशिता आदिका आधारमा समग्र मूल्याङ्कन गरिएको दाबी गरे पनि मतपरिणाम सार्वजनिक नगर्ने निर्णयले यस प्रक्रियाको विश्वसनीयतामै प्रश्न उठाएको छ।

रास्वपाले सुरुमा उत्साहपूर्वक मतदान प्रक्रिया सुरु गरे पनि कुल २ हजार ७७८ मतदाता मध्ये १ हजार ५६७ ले मात्र मतदान गरेका थिए। पार्टीका ६२ जना केन्द्रीय सदस्यहरूमध्ये २७ जनाले मात्र मत खसालेका थिए।

पार्टीका नेता शिशिर खनालका अनुसार उम्मेदवारहरूलाई प्राप्त अङ्क उनीहरूलाई निजी रूपमा जानकारी दिइएको हो। तर सार्वजनिक नगर्नुको कारण भने, ‘थोरै अङ्क पाएका उम्मेदवारहरूको मनोबलमा असर पर्ला कि भनेर हो।’ खनालले यदि सबै उम्मेदवारहरूले चाहे भने अंक सार्वजनिक गर्न सकिने पनि उल्लेख गरे।