कसुरदार हुनसक्ने देखिए पनि यसकारण धरौटीमा छुटे मितेरी सहकारीका अध्यक्ष

काठमाडौँ। जिल्ला अदालत ललितपुरले मितेर सहकारीका अध्यक्ष कुम्भराज गुरुङलाई ३५ लाख रुपैयाँ धरौटीमा छाड्न आदेश गरेको छ। बिहीबार गुरुङ आफैँ अदालतमा उपस्थित भएपछि न्यायाधीश निर्मला योङयाको इजलासमा बयानपछि थुनछेक बहस भएको थियो।

थुनछेक बहसपछि गुरुङ कसुरदार होइनन् भन्ने अवस्था नदेखिए पनि ८१ वर्षीय ज्येष्ठ नागरिक भएको र स्वास्थ्य अवस्था समेत विचार गरी थुनामा पठाउन पर्ने नदेखिएकाले पुर्पक्षका लागि धरौटीमा छाड्न आदेश भएको हो।

मितेरी सहकारीको सावाँ ब्याजसहित १४ करोड र सहकारीका पदाधिकारीबाट थप रकमसमेत गरेर उनले २२ करोड रुपैयाँ ठगेको भेटिएको आरोप छ। मितेरी सहकारी ठगी प्रकरणमा प्रहरीले पक्राउ नगरी उनीविरुद्ध पनि अनुसन्धान गरेको थियो। प्रहरी प्रतिवेदनका आधारमा जिल्ला सरकारी वकिलको कार्यालय ललितपुरले उनीसहितलाई प्रतिवादी बनाइ मुद्दा दायर गरेको थियो।

यसअघि सहकारी ठगी प्रकरणमा अदालतले सुरेश अधिकारीलाई ७ लाख धरौटीमा छाड्दै ज्योति भण्डारी र सुवास खत्रीलाई पुर्पक्षका लागि थुनामा पठाउन आदेश गरेको थियो।

उक्त सहकारी ठगी प्रकरणमा नेपाली कांग्रेसका उपसभापति धनराज गुरुङकी श्रीमती ज्योति गुरुङसहित विजयकुमार राई, प्रितम अधिकारी र अर्जुन अरामलाई पनि प्रतिवादी बनाइएकोमा उनीहरू फरार प्रतिवादीको सूचीमा रहेका छन्।