इजरायली अधिकारीलेले परिवारलाई दिए विपिन जोशी जीवित नरहेको जानकारी

काठमाडौँ:  इजरायली सेनाका अधिकारीले हमासको नियन्त्रणमा रहेका विपिन जोशी जवित नरहेको बताएका छन्।

ती अधिकारीले इजरायलका लागि नेपाली राजदूत धनप्रसाद पण्डित, अमेरिकामा रहेकी विपिनकी बहिनी, नेपालमा रहेका विपिनका दाजु किशोर र इजरायलको प्रधानमन्त्री कार्यालयका दुई अधिकारीहरुलाई भिडियो कन्फरेन्समा जोडेर उक्त जानकारी दिएको राजदूत पण्डितले बताए। जोशीको शव पनि रहे/नरहेको जानकारी आफूहरूलाई नभएको ती अधिकारीले बताएको राजदूत पण्डितले जानकारी दिए।

हमासले मंगलबार २० जना जीवित बन्धकहरूलाई रिहा गर्दैछ। मिडियाका अनुसार हमासले सात इजरायली बन्धकहरूलाई गाजामा रेडक्रसका अधिकारीहरूलाई हस्तान्तरण गरिसकेको छ। बाँकी १७ जनालाई अबको तीन घण्टाभित्र हस्तान्तरण गरिसक्ने सहमति भएको छ।

समाचार एजेन्सी रोयटर्सले अपरेशनमा संलग्न एक अधिकारीलाई उद्धृत गर्दै इजरायली बन्धकहरूलाई रेडक्रसलाई हस्तान्तरण गरिएको पुष्टि गरेको छ। यसअघि रेडक्रसका अधिकारीहरू बन्धकहरूलाई फिर्ता ल्याउन गएको जानकारी आएको थियो। उत्तरी गाजापट्टीमा बन्धक बनाइएकाहरूलाई इजरायल ल्याउने काम रेडक्रसका अधिकारीहरूलाई सुम्पिएको छ।

यहाँ, यी बन्धकहरूलाई इजरायलबाट एउटा किट दिइनेछ, जसमा इजरायली प्रधानमन्त्री बेन्जामिन नेतान्याहू र उनकी श्रीमती सारा नेतान्याहूले लेखेको पत्र र ल्यापटप, मोबाइल फोन, ट्याब्लेट र लुगाहरू हुनेछन्।