अर्थमन्त्री-दातृनिकाय प्रतिनिधिबीच भेटः नेपालमा लगानी बढाउन आग्रह

अर्थमन्त्री रामेश्वरप्रसाद खनालले विभिन्न दातृनिकायका प्रतिनिधिहरुसँग भेट गरी नेपालमा लगानी बढाउन आग्रह गरेका छन्। अर्थमन्त्री खनालले साउदी फन्ड र जापान सहयोग नियोग (जाइका) का प्रतिनिधिसँग छुटाछुट्टै भेटवार्ता गरी नेपालमा पूर्वाधार र मानव विकासका क्षेत्रमा लगानी बढाउन आग्रह गरेको अर्थ मन्त्रालयले जनाएको छ।

भेटका अवसरमा साउदी फन्डका प्रतिनिधिले नेपालमा सिंचाई र जलविद्युतमा लगानी रहने जानकारी गराएका थिए। जापान सहयोग नियोगका प्रतिनिधिसँग विपी राजमार्ग पुनर्स्थापना, नागढुँगा सुरुङ मार्ग र कोटेश्वर सेक्सन आयोजना छिटो अगाडि बढाउने लगायतका विषयमा छलफल भएको अर्थले जानकारी दिएको छ।

अर्थमन्त्री खनालले आजै अन्तर्राष्ट्रिय मुद्रा कोषका एशिया प्रसान्त हेर्ने निर्देशक कृष्णा श्रीनिभासनसँग कोषको सहयोगमा सञ्चालित विस्तारित कर्जा कार्यक्रमको कार्यान्वयनलाई निरन्तरता दिने विषयमा छलफल गरेका छन्।

सो अवसरमा नेपाल राष्ट्र बैंक ऐनमा गर्नुपर्ने संशोधन, वाणिज्य बैंकहरुको कर्जाको पोर्टफोलियो अध्ययन र वित्तीय स्थायित्व कायम गर्ने विषयमा दुवै पक्षबाट विचार आदान प्रदान भएको थियो। छलफलमा नेपाल राष्ट्र बैंकका गभर्नर प्राडा विश्वनाथ पौडेलकोसमेत उपस्थिति थियो।

विश्व बैंक र अन्तर्राष्ट्रिय मुद्रा कोषको वार्षिक बैठकमा भाग लिने क्रममा अमेरिकाको वासिङटन डिसिमा रहेका अर्थमन्त्री खनालले असोज २९ गते अमेरिकाको वाणिज्य प्रतिनिधिसँग आपसी व्यापार र लगानी प्रवर्द्धनका विषयमा छलफल गर्नुका साथै नेपाल ट्रड परफरेन्स प्रोगामको म्याद थप गर्न आग्रह गरेका थिए।

त्यसै गरी अमेरिकी स्टेट डिपार्टमेन्टका प्रतिनिधिसँग दुइ देशका सम्बन्ध सुदृढ गर्ने लगायत आपसी हितका विषयमा संवाद भएको थियो।