काठमाडौँ: प्रधानमन्त्री सुशीला कार्कीले आइतबार मन्त्रिपरिषद् विस्तार गर्दैछिन्। कार्कीले डा. सुधा शर्मा गौतम, खगेन्द्र सुनार, गणपति लाल श्रेष्ठ र बब्लु गुप्तालाई मन्त्री बनाउन सिफारिस गरे पनि विवादमा तानिएपछि सुनार र श्रेष्ठको भने शपथ रोकिएको छ।
बालुवाटार स्रोतका अनुसार आज बब्लु गुप्ता र सुधा शर्मा गौतमको भने शपथ हुने भएको हो। सुनारमाथि बहुविवाह, ठगी, अदालतको मानहानी, चरित्र हत्या, साईबर अपराधलगायतका अभियोग रहेकोमा उनी प्रहरीको फरार अभियुक्तको सूचीमा रहेको भेटिएको हो भने श्रेष्ठमाथि स्थानीयको जग्गा मारबाडी समाजलाई दिएको आरोप लागेको हो।
सुनार र श्रेष्ठको नाम मन्त्रीमा सिफारिस भएपछि सामाजिक सञ्जालमा चौतर्फी आलोचना भएको थियो। आलोचनापछि प्रधानमन्त्री कार्कीले थप छलफल गरेकी थिइन्। छलफलपछि कार्की सुनार र श्रेष्ठको शपथ रोक्ने निष्कर्षमा पुगेकी हुन्।
राष्ट्रपति कार्यालयले दिउँसो साढे २ बजेका लागि शपथ ग्रहण कार्यक्रम तय गरेकोमा विवादपछि दुई जनाको नाम रोकिएपछि शर्मा र गुप्ताको शपथ केही ढिलोगरी हुने भएको छ। शर्माले स्वास्थ्य तथा जनसंख्या मन्त्री र गुप्ताले युवा तथा खेलकुद मन्त्रीको शपथ लिन लागेका हुन्।
