दुई मन्त्रीले लिए शपथ, तेस्रो पटकमा पनि मन्त्रिपरिषद्ले पाएन पूर्णता

काठमाडौँ: नवनियुक्त दुई मन्त्रीहरुले आज पद तथा गोपनियताको शपथ लिएका छन्।

राष्ट्रपति रामचन्द्र पौडेलले राष्ट्रपति कार्यालय, शीतलनिवासमा आयोजित विशेष समारोहमा नवनियुक्त स्वास्थ्य तथा जनसङ्ख्यामन्त्री डा सुधा गौतम र युवा तथा खेलकुदमन्त्री बब्लु गुप्ताले शपथ लिएका हुन्। यसअघि आज बिहान चार मन्त्रीले शपथ लिने भनिए पनि अन्तिम समयमा दुई जना मन्त्रीको मात्रै शपथ भएको हो। अभियन्ताहरू खगेन्द्र सुनार र गणपतिलाल श्रेष्ठको नाम विवादमा तानिएपछि प्रधानमन्त्री सुशीला कार्कीले उनीहरूको शपथ रोकेकी हुन्।

डा गौतम स्वास्थ्य मन्त्रालयका पूर्वसचिव हुन् भने गुप्ता जेनजी आन्दोलनका अगुवा हुन्। प्रधानमन्त्री कार्कीको सिफारिसमा उहाँहरुलाई राष्ट्रपति पौडेलले आज नियुक्ति गरेका हन्। गत भदौ २७ गते गठित मौजुदा मन्त्रिपरिषद्को सङ्ख्या आजको विस्तारसँगै १० पुगेको छ ।

यसअघि गत भदौ ३० र असोज ६ गते मन्त्रिपरिषद् विस्तार भएको थियो। शपथ ग्रहण समारोहमा उपराष्ट्रपति रामसहायप्रसाद यादव, प्रधानमन्त्री कार्की, प्रधानन्यायाधीश प्रकाशमानसिंह राउत, प्रतिनिधिसभाका सभामुख देवराज घिमिरे, मन्त्रीगण, प्रनिधिसभाका उपसभामुख इन्दिरा राना, संवैधानिक निकायका प्रमुख तथा पदाधिकारी, नेपाल सरकारका उच्चपदस्थ अधिकृत, सुरक्षा निकायका प्रमुख तथा अधिकारीलगायत उपस्थित थिए।

प्रधानमन्त्री कार्कीले १२ सदस्यीय मन्त्रिपरिषद् बनाउने तयारी गरेकी छन्। आज मन्त्रिपरिषद्लाई पूर्णता दिने तयारी भए पनि अन्तिममा दुई जनाको नाम रोकिएपछि तेस्रोपटकमा पनि मन्त्रिपरिदषद्ले पूर्णता पाउन नसकेको हो।