संसद् बैठक अवलोकन गर्न नपाएपछि निराश हुँदै फर्किए विद्यार्थी

काठमाडौं– ‘लास्टै दुःख लाइराछ…’ तोकिएको समय संसद्को बैठक सञ्चालन नभएपछि निराश भएर विद्यालय फर्कंदै गरेकी विद्यार्थी समृद्धि तिमिल्सिनाको दुःखेसो हो, यो। मंगलबार राष्ट्रिय सभाको हिजोको बैठक सुरुमै सूचना टाँसेर स्थगन भयो। प्रतिनिधिसभा बैठक दुई घन्टा कुर्दा पनि सुरु हुन सकेन। कुर्दा पनि सुरु नभएको बैठक उनीहरू हिँडेपछि भने सुरु भयो।

भक्तपुरको सल्लाघारीस्थित मोडर्न इङ्लिस स्कुलका ७५ जना विद्यार्थी मंगलबार बिहान ११ बजेका लागि निर्धारित प्रतिनिधिसभाको बैठक हेर्न समयअगावै दर्शकदीर्घामा पुगिसकेका थिए। उनीहरू कुतूहलका साथ बैठक सुरु हुनेमा प्रतीक्षारत थिए। तर, दिउँसो १ बजे बैठक १ः३० बजे बस्ने गरी स्थगनको सूचना आएपछि निराश हुन पुगे। संघीय संसद्मा माध्यमिक तहका विद्यार्थी सामाजिक अध्ययन विषयअन्तर्गत संसदीय गतिविधिलाई प्रत्यक्ष अवलोकन गर्न बेलाबखत आउने गर्छन्।

संसद् सचिवालयले ती विद्यार्थीका लागि प्रवेश अनुमति मिलाउने गर्दछ। यसरी आउन पनि सम्बन्धित विद्यालय र सचिवालयले समय व्यवस्थापन गर्नुपर्ने हुन्छ। कक्षा ९ र १० मा सामाजिक अध्ययन र कक्षा ११ र १२ मा सामाजिक तथा जीवनोपयोगी विषय राखिएको छ।

उनीहरू आफूले जुन उद्देश्यले आएको हो, सो उद्देश्य पूरा नभएकाले त्यसै फर्कनु परेको जवाफ दिए। कक्षा १० की समृद्धि तिमिल्सनाले ठूला–ठूला नेताहरू बस्ने र देश चलाउने कुरा हुने थलोमा यस्तो ढिलाइ, अन्योल र विवाद होला भनेर आफूहरूले नसोचेको प्रतिक्रिया दिइन्।

विद्यार्थी विश्व न्यौपानेले आफूहरूले संसद्लाई प्रत्यक्ष अध्ययन गर्न नपाउँदा दुःख लागेको बताए। केही बेर बैठक बस्ने सूचना किन फर्कंदै हुनुहुन्छ त भन्ने प्रश्नमा उनले भने, ‘विद्यार्थी जीवनमा समयको महत्त्व हुन्छ। हामीलाई विद्यालयले संसद्मा बस्न निर्धारण गरिएको समय सकिएकाले फर्कियौं।’

विद्यार्थीलाई अन्तर्राष्ट्रिय सम्मेलन केन्द्रको परिसर देखाउँदै गरेका विद्यालयका भाइस प्रिन्सिपल साजन कसमाल आफूहरूको १ बजेपछि विद्यालयमा नियमित कक्षा हुने भएकाले फर्किएर जान बाध्य भएको सुनाए।
विद्यार्थीलाई बस चढाउँदै गरेकी विद्यालयका शिक्षक सरिता दाहाल सुरुमा आउँदा बडो उत्साहका साथ आएका भाइबहिनी फर्किंदा निराश भएको बताइन्।

अर्काे कुनै दिन आउनुहुन्छ कि भन्ने जिज्ञासामा उनको जवाफ थियो, ‘अब हेरौं के हुन्छ।’ संसद् अवलोकन गर्न आएका टोखास्थित नितेन मेमोरियल स्कुलका शिक्षक सञ्जीव धितालले भने आफूहरू बैठक बस्छ कि भनेर अझै कुरिरहेको जनाए। उक्त विद्यालयबाट ५९ जना विद्यार्थी आएका थिए।

आर्थिक वर्ष २०८०/८१ को राजस्व र व्ययको वार्षिक अनुमान (बजेट) माथिको सामान्य छलफल जारी रहने कार्यसूची रहेको बैठक सत्ता र प्रतिपक्षी दलबीचको असमझदारीका कारण सुरु हुन ढिलाइ भएको हो।सामाजिक अध्ययनको विषयले विद्यार्थीलाई असल नागरिक बनाउन प्रेरणा दिनुका साथै संविधान, संघीयता र समावेशिताका सन्दर्भमा ज्ञान दिने लक्ष्यका साथ सरकारले माध्यमिक तहको पाठ्यक्रम परिमार्जन गरेको हो।