सोलुमा हिमालयन एभरेष्ट सञ्चालन तयारी,१० करोड लिटर पानी प्रशोधन गर्ने

काठमाडौं। सोलुखुम्बुको दूधकुण्ड नगरपालिकामा पानी प्रशोधन उद्योग खुल्ने भएको छ। हिमालयन एभरेष्ट वाटर प्रालिले उक्त स्थानमा पानी प्रशोधन प्लान्ट स्थापना गर्न लागेको हो।

प्रस्तावित पानी उद्योग स्थापनासम्बन्धी प्रारम्भिक वातावरणीय परीक्षणका लागि सार्वजनिक सुनुवाइ सम्पन्न गरेको छ। सोलुदुधकुण्ड नगरपालिका–८ र ११ को सिमानामा अवस्थित वनवाडेमा सार्वजनिक सुनुवाइ गरिएको छ।

यसअघि ओखलढुंगाको सिद्धिचरण नगरपालिका वडा नम्बर १ मा वार्षिक एक करोड ५० लाख वटा एक लिटरका बोतलहरूमा र आठ लाख वटा २० लिटरका जारहरूमा प्रशोधित पिउने पानी उत्पादन गर्ने प्रस्ताव गरेको थियो।

उद्योग सञ्चालन हुन नसकेपछि उद्योगलाई हाल सोलुखुम्बुको सोलुदुधकुण्ड नगरपालिकाको वडा नम्बर ८ र ११ मा स्थानान्तरण गरिएको हो।

उद्योगले पूर्व प्रस्तावित उत्पादनबाट २० लिटरका जारहरूको प्रशोधित पिउने पानी हटाई वार्षिक आठ करोड १० लाख वटा एक लिटर पानी र दुई करोड ४० लाख वटा आधा लिटरका बोतलहरूमा प्रशोधित पिउने पानी उत्पादनमा थप गर्न क्षमता विस्तार गर्न लागेको हो।

अघिल्लो आर्थिक वर्षमा सरकारले हिमालको पानी ब्राण्डिङ गर्न सरकारले वाटर फ्रम द हिमालय कार्यक्रम सञ्चालन गर्ने भनेको थियो। तर, उक्त योजना कार्यान्वयनमा आउन सकेन।

तत्कालिन अर्थमन्त्री डा. प्रकाशशरण महतले हिमालको पानीलाई ब्राण्डिङ गर्ने गरी वाटर फ्रम द हिमालय कार्यक्रम घोषणा गरेका थिए।
त्यसबेला उनले बजेटमा हिमालको पानीलाई ब्राण्डिङ गरी निर्यातका लागि आवश्यक सहजीकरण गर्ने बताएका थिए।

हाल व्यवसायी अजेयराज सुमार्गीको स्वामित्वमा रसुवामा सञ्चालित हिमालयन वाटरले हिमालय वनटप पानी प्रशोधन गरी विदेशमासमेत निर्यात गरिरहेको छ। उद्योगले उत्पादन गरेको पानी नेपालका साथै विदेशका तारे होटलहरुमा खपत हुने गरेको छ।

सरकारले गरेको एक अध्ययनमा हिमाली क्षेत्रमा यस्ता पानी उद्योग खोल्न उपयुक्त मुहानहरु भेटिएको देखाएको छ। कन्चनजंघा, सगरमाथा, अपी, लाङटाङ, अन्नपूर्ण लगायतका हिमश्रृंखला र संरक्षण क्षेत्रभित्र यस्तो पानी उद्योगको प्लान्ट लगाउन सकिने देखिएको छ।