दुई अर्ब लगानीमा झापामा कोल्ड स्टोरसहितको खाद्य प्रशोधन उद्योग खुल्दै

काठमाडौँ: पछिल्ला वर्ष ठूला व्यावसायिक घरानाहरूले अर्बौं रुपैयाँ लगानीमा कृषिजन्य उत्पादन प्रशोधन गर्न उद्योगहरू स्थापना गरिरहेका छन्। यसैक्रममा  पूर्वाञ्चल इन्डस्ट्रिज प्रालिले दुई अर्ब रुपैयाँ लगानीमा झापाको कन्काइमा कोल्डस्टोरसहितको खाद्य प्रशोधन उद्योग स्थापना हुन लागेको छ।

पूर्वाञ्चल इन्डस्ट्रिजले एकीकृत कृषि प्रशोधन कारखाना स्थापना गर्ने योजना ल्याएको हो। प्रस्तावित उद्योगमा चामल, दाल, गहुँ, मकै, तोरी, सूर्यमुखी तेल प्रशोधनका साथै माछा र कुखुराको दाना उत्पादन गर्ने भएको छ। उद्योगले १० हजार टन उत्पादन भण्डारण गर्ने क्षमता भएको कोल्डस्टोर पूर्वाधार पनि बनाउने भएको छ। उद्योगको वार्षिक उत्पादन क्षमता एक लाख १७ हजार ५२० टन छ।

कारखाना पूर्वाधार निर्माण अहिले प्रारम्भिक चरणमा रहेको छ। उद्योग पूर्वाधार र खाद्य प्रशोधन प्लान्ट स्थापना गर्न एक अर्ब ९९ करोड ९० लाख रुपैयाँ लागत अनुमान गरिएको छ।

जसमा ७० प्रतिशत बैंकको ऋण र बाँकी ३० प्रतिशत संस्थापको स्वपुँजी(इक्विटी) हुने गरी लगानी संरचना बनाइएको छ। परियोजनाका लागि जग्गा अधिग्रहण सुरु गरिएको छ। सिभिल संरचना बनाउन ठेकेदार कम्पनी छनौट गरिएको छ।

यसमा कुल बजेटको ३४ प्रतिशत खर्च हुने भएको छ। नेपालको दक्षिण पूर्वी क्षेत्रमा भारत–नेपाल सीमा र प्रमुख राष्ट्रिय राजमार्गको नजिक रहेकोले कच्चा पदार्थ खरिद र तयार वस्तु वितरणबाट लाभ लिने अपेक्षा गरिएको छ।