ठमेलमा डेढ अर्ब लगानीमा आर्या होटल खुल्यो, फेब्रुअरीदेखि पूर्ण क्षमतामा चल्ने

काठमाडौँ: राजधानीको प्रमुख पर्यटकीय केन्द्र ठमेलमा चारतारेस्तररका होटलहरू निर्माण भइरहेका छन्। यसैबिच चारतारे स्तरको आर्या होटल एन्ड स्पा थपिएको छ। डेढ अर्बभन्दा बढी लगानीमा निर्माण भएको होटल हाल आंशिक रूपमा सञ्चालनमा आइसकेको छ। आगामी फेब्रुअरीदेखि पूर्ण क्षमतामा सञ्चालनमा आउने छ।

कूल ८० कोठा क्षमता रहेको आर्या होटलका ६० कोठा निर्माण सम्पन्न भई सञ्चालनमा आइसकेका छन्। बाँकी २० कोठा निर्माणको अन्तिम चरणमा रहेका छन्, जसलाई फेब्रुअरीमा सञ्चालनमा ल्याइने होटल व्यवस्थापनले जनाएको छ।

होटल निर्माणमा एक अर्ब ५५ करोड १० लाख रुपैयाँ लगानी गरिएको छ। यसमध्ये एक अर्ब नौ करोड १० लाख रुपैयाँ बैंक ऋण र ४६ करोड रुपैयाँ संस्थापकको स्वपुँजी (इक्विटी) बाट जुटाइएको हो। कुल लगानीमध्ये ७० प्रतिशत बैंक ऋण र ३० प्रतिशत स्वपुँजी रहने गरी वित्तीय संरचना बनाइएको छ।

होटलका एकमात्र प्रवर्द्धक कृष्णप्रसाद सिम्खडा हुन्। आतिथ्य व्यवसायमा दुई दशकभन्दा बढीको अनुभव भएका सिम्खडा ग्रिसा अटो, अटो पार्क जापान, एभरेस्ट फूड (जापानमा चेन रेस्टुरेन्ट) र आर्य कम्पनी लिमिटेडका संस्थापक अध्यक्ष पनि हुन्। उनको जापानमा १४ वटा चेन रेस्टुरेन्ट सञ्चालनमा छन्। सिम्खडाको यस क्षेत्रमा लामो अनुभवलाई ध्यानमा राख्दै अन्तर्राष्ट्रिय टुर अपरेटरहरूसँग सञ्जाल स्थापित गरेका छन्।

होटलमा सबै किसिमका आधुनिक सुविधाहरू फूड एन्ड बेभरेज सेवा, स्विमिङ पूल, सम्मेलन हल, ज्याकुजी, स्पालगायत अन्य सुविधाहरू उपलब्ध हुने आर्याले जनाएको छ। होटल काठमाडौँको ठमेलमा केन्द्रमा अवस्थित छ। त्रिभुवन अन्तर्राष्ट्रिय विमानस्थलबाट करिब ६ किलोमिटरको दूरीमा छ।

काठमाडौँमा पर्यटकहरूको आगमन उच्च छ। किनकि यो उडानमार्फत देशमा अन्तर्राष्ट्रिय पर्यटकहरूको प्रवेश विन्दु हो।

नेपालको सबैभन्दा आकर्षक पर्यटकीय गन्तव्यहरू मध्ये एक हो ठमेल, जहाँ हरेक वर्ष ठूलो संख्यामा पर्यटकहरू भ्रमण गर्छन्। आर्य होटल एण्ड स्पा सन् २०१८ मा स्थापना भएको हो। गत अगस्टदेखि काठमाडौंको ठमेलमा चारतारे होटलको सञ्चालन सुरु गरेको छ। होटल ६१४.८८ वर्गमिटर जमिनमा फैलिएको छ।