काठमाडौँ: राष्ट्रिय ट्रमा सेन्टरमा आधुनिक प्रविधिमा आधारित मोडुलर शल्यक्रिया कक्ष सञ्चालनमा आएपछि शल्यक्रियापछिको सङ्क्रमण नियन्त्रणमा उल्लेख्य सुधार देखिएको छ। देशभरबाट गम्भीर दुर्घटनाका घाइते उपचारका लागि आउने यस सेन्टरमा पाँचवटा अत्याधुनिक मोडुलर ओटी सञ्चालनमा ल्याइएपछि उपचार सुरक्षित र प्रभावकारी बनेको हो।
शल्यक्रियापछि बिरामीमा सङ्क्रमण फैलिनु स्वास्थ्य सेवाको सबैभन्दा जटिल चुनौतीमध्ये एक हो। यही चुनौतीलाई ध्यानमा राख्दै मोडुलर ओटी निर्माण गरिएको राष्ट्रिय ट्रमा सेन्टरका निर्देशक डा. रुद्र मरासिनीले बताए। ‘शल्यक्रिया सफल भए पनि सङ्क्रमण नियन्त्रण हुन सकेन भने उपचारको उद्देश्य नै अधुरो हुन्छ,’ उनले भने, ‘मोडुलर ओटीले यो जोखिम न्यून गर्दै बिरामी र चिकित्सक दुवैका लागि सुरक्षित वातावरण दिएको छ।’
मोडुलर ओटीमा जडान गरिएको हावा फिल्टर प्रणाली, सेन्सरयुक्त ढोका तथा एकीकृत संरचनाले हावामा रहेका ब्याक्टेरिया, भाइरस र धुलोलाई प्रभावकारी रूपमा नियन्त्रण गर्दछ। यस्तो प्रविधिले शल्यक्रियापछि बिरामी छिटो निको हुने, अस्पताल बसाइँ अवधि घट्ने र उपचारको समग्र गुणस्तर सुधार हुने गरेको छ।
अस्पतालका प्रमुख मेडिकल सुपरिन्टेन्डेन्ट डा. मरासिनीले परम्परागत सिमेन्ट र इँटाले बनेका शल्यक्रिया कक्षभन्दा मोडुलर ओटी वैज्ञानिक डिजाइनमा आधारित हुने बताए। पर्खाल, छत, भुइँ र हावाप्रवाह प्रणालीलाई एकीकृत रूपमा डिजाइन गरिएकाले अन्तर्राष्ट्रिय मापदण्डअनुसार उच्च स्तरको सङ्क्रमण नियन्त्रण सम्भव भएको उनले भने।
मोडुलर ओटी निर्माणमा आर्थिक अनुशासनसमेत कायम गरिएको ट्रमा सेन्टरको दाबी छ। कुल नौ करोड ७८ लाख १८ हजार रुपैयाँमा निर्माण सम्पन्न गर्ने सम्झौता भए पनि काम ढिलो गरेको र सामग्रीको परिमाण घटाएर भुक्तानी दिइएकाले एक करोड ३६ लाख नौ हजार ८६५ रुपैयाँ बचत भएको सेन्टरले जनाएको छ। सम्झौताभन्दा बढी समय लगाएको कारण निर्माण कम्पनी म्याक्सिम इन्कर्पोरेसन ट्रेडर्सलाई ८६ लाख ५६ हजार ४६४ रुपैयाँ जरिवाना गरिएको छ।
सङ्क्रमणसम्बन्धी फोकल पर्सन सोचना सापकोटाका अनुसार ट्रमा सेन्टरमा आउने बिरामीको प्रकृति नै उच्च जोखिमयुक्त हुने भएकाले सङ्क्रमणको सम्भावना धेरै हुन्छ। ‘सानो चोटमा पनि सङ्क्रमण फैलिन सक्छ,’ उनले भने, ‘तर मोडुलर ओटी सञ्चालनपछि सङ्क्रमणदर घट्दै गएको तथ्यांकले देखाएको छ।’
