६ महिनामा भित्रिए साढे १२ लाख मोबाइल फोन, बाहिरियो २३ अर्ब बढी रुपैयाँ

काठमाडौँ: चालु आर्थिक वर्ष २०८२/८३ को पहिलो ६ महिनामा मोबाइल फोन प्रयोगकर्ताको संख्या बढेको छ। भन्सार विभागको हालै सार्वजनिक तथ्यांकअनुसार साउनदेखि पुससम्म ६ महिनामा मात्रै १२ लाख ५२ हजार ६३४ थान स्मार्ट मोबाइल फोन नेपाल भित्रिएका छन्।

उक्त मोबाइल फोन आयातमा नेपाली २३ अर्ब २९ करोड रुपैयाँ बाहिरिएको छ। मोबाइल फोन आयातबाट सरकारले ४ अर्ब ३४ करोड रुपैयाँ राजस्व संकलन गरेको छ।

अघिल्लो आवको यसै अवधिको तुलनामा यस वर्ष मोबाइल फोनको बिक्री बढेको देखिन्छ। अघिल्लो आव २०८१/८२ को साउनदेखि पुस मसान्तसम्ममा ११ लाख ११ हजार ५५६ थान मोबाइल आयात भएका थिए। उक्त अवधिमा १६ अर्ब ७१ करोड रुपैयाँ बराबरको स्मार्ट मोबाइल फोन आयात भएकोमा त्यसबाट सरकारले ३ अर्ब ११ करोड रुपैयाँ राजस्व संकलन गरेको थियो।

चालु आवको ६ महिनामा अघिल्लो आवको ६ महिनाको तुलनामा ६ अर्ब ५८ करोड रुपैयाँ बढीको स्मार्ट मोबाइल फोन नेपाल भित्रिएको हो।