क्रिकेटदेखि कमेन्ट्रीसम्म, राजनीतिदेखि टिभी शोसम्म

केही समयअघि नवजोत सिंह सिद्धू ओटीटी प्लेटफर्म नेटफ्लिक्सको ‘द ग्रेट इन्डियन कपिल शर्मा’ शोमा ‘परमानेन्ट गेस्ट’ (स्थायी पाहुना) को रूपमा फिर्ता भए। सिद्धू यस शोमा ६ वर्षपछि फर्किएका हुन्।

भनिन्छ कि २०१९ मा पुलवामा हमलामा मारिएका ४० भन्दा बढी भारतीय सैनिकको मृत्युमा विवादास्पद टिप्पणी गरेपछि सिद्धूलाई कपिल शर्माको शोबाट निकालिएको थियो। उनलाई जान्नेहरू भन्छन् कि सिद्धू निकै तेज र केही हदसम्म बढी बोल्ने स्वभावका छन्। उनलाई चर्चामा रहन मन पर्छ। टिभी शोदेखि क्रिकेटको कमेन्ट्री बक्स र राजनीतिको मैदानसम्म, उनी आफ्नो एक विशेष शैलीका लागि चिनिन्छन्।

पञ्जाबको पटियालामा जन्मिएका सिद्धूका पिता सरदार भगवन्त सिंह पनि प्रख्यात क्रिकेटर थिए। सिद्धूले १९८३-८४ को टेस्ट सिरिजमा भारतीय टोलीबाट डेब्यु गरेका थिए। सुरुमा उनी त्यति सफल भने हुन सकेनन्। तर १९८७ को वनडे वर्ल्ड कपमा उनले शानदार पुनरागमन गर्दै चारवटा अर्धशतक बनाए। आफ्नो आक्रामक ब्याटिङका लागि चर्चित सिद्धू ‘सिक्सर सिद्धू’ को नामले चिनिन थाले।

विज्ञहरूका अनुसार सिद्धूको क्रिकेट उनको व्यक्तित्वको छवि हो। उनी एकैसाथ रक्षात्मक र आक्रामक दुवै शैलीमा क्रिकेट खेल्थे। १९८३ देखि १९९९ को बीचमा उनले भारतका लागि ५१ टेस्ट म्याच खेले, जसमा उनको औसत ४२.१३ रह्यो। बीबीसी हिन्दीका संवाददाता सौतिक विश्वासले सिद्धूको बारेमा लेखेका छन् कि उनी आफ्नो प्रदर्शनप्रति यति चिन्तित हुन्थे कि उनी खेल जीवनमा रहँदा न त कहिल्यै कुनै पार्टीमा गए, न त कुनै फिल्म नै हेरे। सिद्धू निकै धार्मिक छन् र पूर्ण रूपमा शाकाहारी खाना खान्छन्।

तर, उनै सिद्धू १९९६ मा आफ्ना कप्तान मोहम्मद अजहरुद्दीनको व्यवहारबाट रिसाएर सिरिजको बीचमै इङ्गल्याण्ड छोडेर भारत फर्किएका थिए। पूर्व बीसीसीआई अध्यक्ष जयवन्त लेलेले आफ्नो आत्मकथामा लेखेका छन् कि अजहरुद्दीनले केही भनेको कुरामा सिद्धूलाई लाग्यो कि कप्तानले उनलाई गाली गरिरहेका छन्।

सिद्धूले सन् २००१ मा भारतको श्रीलंका भ्रमणबाट कमेन्टेटरको रूपमा नयाँ यात्रा सुरु गरे। छोटो समयमै उनी आफ्ना ‘वान-लाइनर्स’ का कारण लोकप्रिय भए। ‘खटाक’, ‘छा गए’ र ‘वाह! गुरु’ जस्ता शब्दहरूले उनलाई ठूलो प्रशंसक समूह दिलायो। उनको कमेन्ट्री शैलीलाई ‘सिद्धूइज्म’ भन्न थालियो।

२००९ मा उनी कमेन्ट्री छोडेका राजनीतितर्फ लागे। तर २०२४ मा आईपीएलमा पुनः कमेन्ट्रीमै फर्किए। लामो समयपछि कमेन्ट्री बक्समा फर्किए पनि उनको शैली र बोल्ने कलामा कुनै कमी आएको देखिएन।

सिद्धूले १९९९ मा अन्तर्राष्ट्रिय क्रिकेटबाट सन्यास लिए। पाँच वर्षपछि अर्थात् २००४ मा उनी भारतीय जनता पार्टी (भाजपा) मा प्रवेश गरे। २००४ देखि २०१४ सम्म उनी अमृतसरबाट लोकसभा सांसद चुनिए। २०१६ मा भाजपाले उनलाई राज्यसभा सदस्य मनोनित गर्‍यो, तर पञ्जाबको राजनीतिमा सक्रिय हुन उनले राजीनामा दिए। २०१७ मा उनी भाजपा छोडेर कांग्रेसमा प्रवेश गरे र अमृतसर पूर्वबाट विधायक बने। उनले पञ्जाब सरकारमा मन्त्रीको पद पनि सम्हाले तर तत्कालीन मुख्यमन्त्री क्याप्टेन अमरिन्दर सिंहसँग उनको सम्बन्ध सुमधुर हुन सकेन।

इमरानको तारिफ, विवाद र जेल यात्रा
२०१८ मा पाकिस्तानमा इमरान खान प्रधानमन्त्री बन्दा सिद्धू उनको शपथ ग्रहण समारोहमा गएका थिए। त्यहाँ उनले पाकिस्तानी सेना प्रमुख कमर जावेद बाजवालाई अंकमाल गरेपछि भारतमा ठूलो विवाद भएको थियो। पञ्जाबको राजनीतिमा सिद्धू आफैँ मुख्यमन्त्री बन्न चाहन्थे, जसका कारण अमरिन्दर सिंहसँग उनको दूरी बढ्यो।

२७ डिसेम्बर १९८८ को साँझ पटियालामा पार्किङको विषयमा विवाद हुँदा ६५ वर्षीय वृद्ध गुरनाम सिंहसँग सिद्धूको झगडा भएको थियो। हात हालाहालको क्रममा गुरनाम सिंहको मृत्यु भयो। यस मुद्दामा लामो कानुनी लडाइँ चल्यो। अन्ततः मे २०२२ मा सर्वोच्च न्यायालयले उनलाई एक वर्षको जेल सजाय सुनायो। जेलमा राम्रो व्यवहारका कारण उनलाई १० महिनापछि नै रिहा गरियो।

पत्नीको क्यान्सर र विवादास्पद बयान
सिद्धूकी पत्नी नवजोत कौर सिद्धूलाई क्यान्सर भएपछि उनी केही समय राजनीति र कमेन्ट्रीबाट टाढा रहे। नोभेम्बर २०२४ मा सिद्धूले आफ्नी पत्नी क्यान्सरमुक्त भएको दाबी गरे। तर, उनले क्यान्सर निको पार्न केही घरेलु खानेकुरा (बेसार, नीम आदि) को श्रेय दिएपछि टाटा मेमोरियल अस्पतालका डाक्टरहरूले त्यसको विरोध गरे। डाक्टरहरूका अनुसार यस्ता दाबीको कुनै वैज्ञानिक प्रमाण छैन र यसले बिरामीहरूलाई भ्रममा पार्न सक्छ।

तमाम विवाद र उतारचढावका बाबजुद सिद्धू फेरि एकपटक मनोरञ्जनको दुनियाँमा फर्किएका छन्। र उनको उपस्थितिलाई दर्शकले रुचाइरहेका छन्। –बीबीसी हिन्दीको सहयोगमा