काठमाडौँ: आईसीसी टी–२० विश्वकप २०२६ अन्तर्गत समूह चरणको आफ्नो तेस्रो खेलमा नेपाल ले दुई पटकको विजेता वेस्ट इन्डिज सँग ९ विकेटको हार बेहोर्दै प्रतियोगिताबाट बाहिरिएको छ। लगातार तेस्रो पराजयसँगै नेपाल अंकविहीन रहँदै समूह चरणमै रोकियो भने वेस्ट इन्डिज भने लगातार तीन जितसहित सुपर एटमा पुग्ने पहिलो टोली बन्यो।
यसअघि नेपाल इंग्ल्यान्ड र इटलीसँग पनि पराजित भइसकेको थियो। समूह ‘सी’ मा वेस्ट इन्डिज ६ अंकसहित शीर्ष स्थानमा रहँदा इंग्ल्यान्ड ४ अंकका साथ दोस्रो स्थानमा छ। स्कटल्याण्ड र इटली समान २–२ अंकमा तेस्रो र चौथो स्थानमा छन्। बाँकी खेलमा इटलीलाई हराए इंग्ल्यान्ड सुपर एटमा पुग्नेछ भने इटलीका लागि दुवै खेल जित्नु अनिवार्य छ। नेपालले भने अब स्कटल्याण्डविरुद्धको अन्तिम खेल प्रतिष्ठाका लागि मात्र खेल्नेछ।
मुम्बई स्थित वानखेडे स्टेडियम मा भएको खेलमा नेपालले दिएको १३४ रनको लक्ष्य वेस्ट इन्डिजले १५.२ ओभरमा मात्र १ विकेट गुमाएर सजिलै पूरा गर्यो। कप्तान शाई होप ४४ बलमा ६१ रन बनाउँदै अविजित रहे भने शिमरोन हेतमायर ले ४६ रनको योगदान दिए। यी दुईबीच दोस्रो विकेटका लागि अविजित ९१ रनको साझेदारी भयो। ओपनर ब्रान्डन किङले २२ रन जोडेका थिए। नेपालका लागि नन्दन यादवले एकमात्र विकेट लिए।
टस हारेर पहिले ब्याटिङ गरेको नेपालले ८ विकेट गुमाउँदै १३३ रन बनाएको थियो। सुरुआत कमजोर रहे पनि उपकप्तान दीपेन्द्र सिंह ऐरी को अर्धशतकले टोलीलाई प्रतिस्पर्धी योगफलसम्म पुर्यायो। उनले ४७ बलमा ५८ रन बनाए। टी–२० विश्वकपमा नेपालका लागि अर्धशतक बनाउने उनी दोस्रो खेलाडी बने; यसअघि सन् २०१४ संस्करणमा सुबास खकुरेलले अफगानिस्तानविरुद्ध अर्धशतक बनाएका थिए।
यस खेलमा पहिलोपटक अवसर पाएका सोमपाल कामी ले १५ बलमा अविजित २६ रन जोडे। दीपेन्द्र र सोमपालबीच सातौँ विकेटका लागि बनेको ५४ रनको साझेदारी नै नेपालको इनिङ्सको सबैभन्दा ठूलो साझेदारी रह्यो। गुल्सन झासँग छैटौँ विकेटका लागि २७ रनको सहकार्य पनि महत्वपूर्ण बन्यो। अन्य ब्याटरहरू भने दोहोरो अंकमा टिक्न संघर्षरत देखिए।
पावर प्लेमा ३ विकेट गुमाउँदै मात्र २२ रन बनाएको नेपालले विश्वकप इतिहासकै सबैभन्दा कमजोर सुरुआत गर्यो। कुशल भुर्तेल पहिलो ओभरमै आउट भए भने रोहित पौडेल, आसिफ शेख, आरिफ शेख र लोकेश बम सस्तैमा फर्किँदा टोली दबाबमा परेको थियो।
बलिङतर्फ वेस्ट इन्डिजका जेसन होल्डरले ४ विकेट लिए भने अकिल होसेन, म्याथ्यु फोर्डे, शमार जोसेफ र रोस्टन चेसले समान १–१ विकेट लिए।
यसै खेलसँगै सोमपाल कामी नेपालबाट तीनवटै टी–२० विश्वकप खेल्ने पहिलो खेलाडी बने। सन् २०१४ मा डेब्यु गरेका उनले त्यसपछिका सबै संस्करणमा सहभागिता जनाउँदै नयाँ कीर्तिमान कायम गरेका हुन्। साथै, टी–२० विश्वकपमा नेपालका लागि सर्वाधिक खेल खेल्ने कीर्तिमान पनि उनको नाममा पुगेको छ।
