लगानी बढाउँदै शेर्पा हस्पिटालिटी, दुई अर्ब ६० करोडमा लैनचौरमा पाँचतारे ‘ले शेर्पा होटल’ ल्याउँदै

काठमाडौँ: राजधानीमा अर्बौँ रूपैयाँ निजी लगानीमा पाँचतारे होटल खुल्ने क्रम बढ्दो छ। पछिल्लो समय ठमेल तथा लैनचौर क्षेत्रमा होटल निर्माण तीव्र गतिमा बढिरहेको पाइन्छ। विश्वप्रख्यात होटल चेनहरू सेराटन, मेरियट तथा अलफ्टजस्ता ब्रान्डहरू यही क्षेत्रमा आइसकेका छन्।

यही बेला शेर्पा हस्पिटालिटी ग्रुपले राजधानीको लैनचौरमा पाँचतारे स्तरको ले शेर्पा होटल निर्माण गरिरहेको छ। होटलको हालसम्म ६२ प्रतिशत वित्तीय प्रगति भएको छ। कुल ११० कोठा हुने होटल बनाउन दुई अर्ब ६० करोड ३० लाख रुपैयाँ लाग्ने अनुमान गरिएको छ। एक अर्ब ७५ करोड रुपैयाँ बैंकबाट ऋण लिइएको छ। बाँकी लगानी संस्थापकको स्वपुँजी (इक्विट) हुने होटलले जनाएको छ।

निर्माणाधीन होटलमा रेस्टुरेन्ट, स्विमिङ पूल, सम्मेलन हल, बैंक्वेट हल, स्पा, क्यासिनोलगायत धेरै आधुनिक सुविधाहरू उपलब्ध हुने भएको छ। स्वदेशी तथा विदेशी पाहुनालाई लक्षित गर्दै बनाउन लागिएको होटल ले शेर्पा १० तलाको हुनेछ। शेर्पा हस्पिटालिटी नेपालको पर्यटन तथा आतिथ्य क्षेत्रको प्रतिष्ठित व्यवसायिक समूह हो। समूहलले नेपालभरी विभिन्न स्थानहरूमा ३० भन्दा बढी विभिन्न स्तरका होटलहरू सञ्चालन गरिरहेको छ।

निर्माणाधीन होटल काठमाडौँको लैनचौरमा त्रिभुवन अन्तर्राष्ट्रिय विमानस्थलबाट पाँच किलोमिटरको दूरीमा छ। काठमाडौँमा पर्यटकको आगमन उच्च छ। उडानमार्फत अन्तर्राष्ट्रिय पर्यटकहरूको प्रवेश बिन्दु हो। नेपालको सबैभन्दा आकर्षक पर्यटकीय गन्तव्यहरू मध्ये एक हो जहाँ हरेक वर्ष ठूलो संख्यामा पर्यटकहरू भ्रमण गर्छन्।

समूहले यती एयरलाइन्स र तारा एयर सञ्चालन गरिरहेको छ। यतीको कार्यकारी अध्यक्ष लाक्पा सोनाम शेर्पा हुन्। उनी थामसेर्कु ट्रेकिङका प्रबन्ध निर्देशक र पासङ ल्हामु पर्वतारोहण फाउन्डेसनका प्रथम उपाध्यक्ष छन्। उनी मुस्ताङ माउन्टेन होम लिमिटेड र गोकर्ण फरेस्ट रिसोर्टका सञ्चालक पनि हुन्।

यस्तै सञ्चालक चन्द्र शेर्पा उड्डयन र पर्यटन व्यवसायमा चार दशकभन्दा बढी अनुभव छ। उनी यती एयरलाइन्सका प्रबन्ध निर्देशक र यती एडभेन्चरका अध्यक्ष पनि हुन्। ले शेर्पा होटल सन् २०१४ मा स्थापना भएको थियो।

नेपालको होटल उद्योगमा अधिक प्रतिस्पर्धा छ। विभिन्न क्षेत्रहरूमा ठूलो संख्याको उपस्थितिले प्रतिस्पर्धा झनै बढाएको छ। होटल उद्योगमा व्यवसाय स्तर, आम्दानी, घरेलु र विश्वव्यापी बजार दुवैमा समष्टिगत आर्थिक प्रवृत्तिहरूको लागि संवेदनशील छ।

होटल परियोजनाको समय लामो हुन्छ। किनकि प्रिमियम होटल निर्माण गर्न तीनदेखि चार वर्ष लाग्छ।