चैत १८ पछि अनिवार्य अवकाशमा जाँदै प्रधानन्यायाधीश राउत, कसले सम्हाल्दैछ सर्वोच्चको नेतृत्व?

काठमाडौँ: प्रधानन्यायाधीश प्रकाशमानसिंह राउत ६५ वर्षे उमेरहदका कारण आगामी चैत १८ गतेदेखि अनिवार्य अवकाशमा जाँदैछन्। प्रधानन्यायाधीश अवकाशमा जानुभन्दा एक महिना पहिले नै नयाँ प्रधानन्यायाधीशको नाम सिफारिस गर्ने व्यवस्थाअनुसार सर्वोच्च अदालतको प्रधान्यायाधीशका लागि ६ जना न्यायाधीशको नाम सिफारिस गरेरिएको छ।

न्याय परिषद्को बैठकले सर्वोच्च अदालतका वरिष्ठतम् न्यायाधीश सपना प्रधान मल्ल, न्यायाधीश डा. मनोजकुमार शर्मा, कुमार रेग्मी, हरि फुँयाल, तिलप्रसाद श्रेष्ठ र डा. नहकुल सुवेदीको नाम सिफारिस गरेको छ। सर्वोच्च अदालतमा तीन वर्ष काम गरेका न्यायाधीशहरू प्रधानन्यायाधीशका लागि योग्य हुन्छन्। सोहीअनुसार वरिष्ठतम्का आधारमा ६ जनाको नाम सिफारिस गरिएको हो।

वरिष्ठतमको रोलक्रमअनुसार अब वरिष्ठतम न्यायाधीश मल्लले सर्वोच्चको नेतृत्व सम्हाल्ने पक्काजस्तै छ। तर संवैधानिक परिषद्ले सिफारिस गर्ने प्रस्तावित प्रधानन्यायाधीश संसदीय सुनुवाइबाट अनुमोदन भएपछि नियुक्त हुन्छन्। यदि मल्ल संसदीय सुनुवाई समितिबाट अनुमोदन नभएमा सिफारिस भएकाबाट अन्य कुनै न्यायाधीशले जिम्मेवारी सम्हाल्ने अवसर पाउनेछन्।

वरिष्ठतमका आधारमा मल्लपछि न्यायाधीशहरू कुमार रेग्मी, हरिप्रसाद फुयाल, मनोजकुमार शर्मा, नहकुल सुवेदी र तिलप्रसाद श्रेष्ठ रहेका छन्।