विराट गोल्डकप चैत २८ देखि, करोड बढी खर्च अनुमान गरिएको प्रतियोगताको यस्तो छ तयारी

विराटनगर: पूर्वको प्रतिष्ठित फुटबल प्रतियोगिता ‘विराट गोल्डकप’को ३८औँ संस्करण आगामी चैत २८ गतेदेखि सुरु हुने भएको छ। विराटनगरको सहिद रंगशालामा आयोजना हुने यो प्रतियोगिता २०८३ वैशाख ५ गतेसम्म चल्नेछ।

आयोजक विराट गोल्डकप फुटबल ट्रष्टले बुधबार पत्रकार सम्मेलन गर्दै प्रतियोगिताको सम्पूर्ण तयारी र सहभागी टोलीबारे जानकारी दिएको हो। यस पटकको गोल्डकपमा नेपालका ७ र भारतको १ गरी कुल ८ वटा व्यवसायिक फुटबल क्लबहरूले उपाधिका लागि प्रतिस्पर्धा गर्नेछन्।

विगतमा झैँ यस वर्ष पनि खेलहरू फ्लड लाइटको माध्यमबाट साँझ ६ बजेदेखि सञ्चालन गरिनेछ। दर्शकको उत्साहलाई मध्यनजर गर्दै आयोजकले दिवा–रात्रीकालीन खेललाई निरन्तरता दिएको हो। प्रतियोगिताको विजेताले आकर्षक ११ लाख रुपैयाँ नगद र शिल्ड प्राप्त गर्नेछ भने उपविजेताले ५ लाख रुपैयाँमा चित्त बुझाउनुपर्नेछ।

यस पटक काठमाडौँका स्थापित क्लबहरू नेपाल पुलिस, त्रिभुवन आर्मी, एपीएफ, मच्छिन्द्र र चर्च ब्वाइज युनाइटेड मैदानमा उत्रिनेछन्। मोफसलबाट झापा–११ र स्थानीय टोलीका रूपमा सम्राट फुटबल क्लब विराटनगरले सहभागिता जनाउनेछन्। यस्तै, अन्तर्राष्ट्रिय टोलीको रूपमा भारतको झारखण्डस्थित ‘अल झारखण्ड विर्शामुण्डा फुटबल एकेडेमी’ले पनि प्रतिस्पर्धा गर्ने ट्रष्टका अध्यक्ष किशोरबहादुर शाहीले जानकारी दिए।

विगतका संस्करणहरूमा आयोजक ट्रष्ट आफैले टिम बनाएर उतार्ने गरेकोमा यस पटक भने व्यावसायिकतालाई जोड दिइएको छ। पहिलोपटक जिल्ला लिग विजेता ‘सम्राट फुटबल क्लब’लाई स्थानीय टोलीको रूपमा खेल्ने अवसर दिइएको छ। अध्यक्ष शाहीका अनुसार, फुटबलमा सक्रिय र व्यावसायिक क्लबलाई प्रोत्साहन गर्न यो निर्णय लिइएको हो।

प्रतियोगिता सम्पन्न गर्न करिब १ करोड ५ लाख रुपैयाँ खर्च हुने अनुमान गरिएको छ। यस पटक नोबेल मेडिकल कलेज प्रतियोगिताको मुख्य प्रायोजक रहेको छ, जसले ११ लाख रुपैयाँ सहयोग गरेको छ। यस्तै, ट्रष्टी एवं नेपाल उद्योग वाणिज्य महासंघ कोशी प्रदेशका अध्यक्ष राजेन्द्र राउतले प्रतियोगितामा आर्थिक घाटा भएमा त्यसको निश्चित प्रतिशत आफूले बेहोर्ने प्रतिबद्धता जनाएका छन्।

प्रतियोगिताका लागि मैदान र फ्लड लाइट मर्मतको काम भइरहेको छ। यद्यपि, रंगशालाको जेनेरेटर बिग्रिएका कारण केही प्राविधिक चुनौती देखिएको छ। कोशी प्रदेश खेलकुद विकास बोर्ड मातहत रहेको फ्लड लाइट प्रयोग गरेबापत आयोजकले दैनिक ५ हजार रुपैयाँ शुल्क बुझाउनुपर्नेछ। रंगशाला क्षेत्रमा प्रचारप्रसार र होर्डिङ बोर्ड व्यवस्थापनको कामलाई पनि तीव्र पारिएको ट्रष्टका महासचिव विनेश बस्नेतले बताए।