एमाले र राप्रपा अस्थिरतातर्फ लागे : प्रधानमन्त्री प्रचण्ड

काठमाडौँ- प्रधानमन्त्री पुष्पकमल दाहाल प्रचण्डले नेकपा एमाले र राष्ट्रिय प्रजातन्त्र पार्टी अस्थिरतातर्फ गएको टिप्पणी गरेका छन्। प्रतिनिधि सभा बैठकमा विश्वासको मत लिनका लागि प्रस्ताव पेस गर्ने क्रममा सम्बोधन गर्दै उनले यस्तो टिप्पणी गरेका हुन्।

‘एमाले र राप्रपा अस्थिरता तर्फ जानु चिन्ताजनक विषय हो,’ उनले भने, ‘सरकार बनेको २ महिना नपुग्दै विश्वासको मत फिर्ता लिने निर्णयबारे निर्णयकर्ताले नै जवाफ दिनुपर्छ। सरकारको गलत कामका कारण हामीले समर्थन फिर्ता लियौं भनेर चाहिँ उहाँहरुले अहिलेसम्म भन्नुभएको छैन।’

आफूले विश्वासको मत लिएको दुई महिना पनि नपुग्दै विश्वासको मत लिनुपर्छ भनेर आफूलाई नलागेको तर एमाले र राप्रपाको अस्थिर निर्णयका कारण विश्वासको मत लिनुपर्ने अवस्था सिर्जना भएको उनले बताए।

‘स्थायित्वको वाचासहित सरकार बनाएका थियौं। निराशालाई चिर्दै जनतामा आशासमेत जगाएको थियो,’ उनले भने, ‘राष्ट्रपतिमा मैले राष्ट्रिय सहमतिको प्रस्ताव गरेपछि एमाले र राप्रपाले समर्थन फिर्ता लिए। सरकार बनेको २ महिना नपुग्दा विश्वासको मत फिर्ता लिने निर्णयबारे निर्णयकर्ताले नै जवाफ दिनुपर्छ।’

विगतका मतभेद नकोट्याउने निर्णय भएको समेत उनले स्मरण गरे। तर त्यसलाई भने एमालेका अध्यक्ष केपी शर्मा ओलीले त्यसलाई पालना नगरेको उनको भनाइ छ।

‘संसद्को पहिलो बैठकमै संसद् विघटनको विषय प्रवेश भयो। त्यो कुनै गर्वको विषय थिएन। सर्वोच्च अदालतले दुई पटक असंवैधानिक भनेको थियो, संसद् विघटनको खुला पक्षपोषणले संवैधानिक र राजनीतिक चुनौति मलाई दियो। प्रधानमन्त्रीकारुपमा मैले लगभग राष्ट्रिय सहमति पाएँ,’ उनले भने, ‘ मैले राष्ट्रपतिमा राष्ट्रिय समिति खोज्न चाहेँ। समझदारीमै नेपाली कांग्रेसलाई राष्ट्रपति दिऔं भनेर एमालेका अध्यक्षसँग ठोस्रुपमा प्रस्ताव राखेँ। तर, त्यसमा सहमित हुन सकेन। प्रधानमन्त्रीकारुपमा मैले गरेको प्रयासमा कुनै खोट थिएन।’

प्रधानमन्त्रीले पेस गर्ने प्रस्तावमाथि प्रतिनिधि सभाको बैठकमा आजै निर्णयार्थ प्रस्तुत गर्ने कार्यसूची संसद सचिवालयले तय गरिसकेको छ।

दाहाललाई माओवादी, नेपाली कांग्रेस, नेकपा एस, जसपा, लोसपा, जनमत, नागरिक उन्मुक्ति, नेसपा र रास्वपाले विश्वासको मत दिने तयारी गरेका छन्। शनिबार प्रधानमन्त्री निवास बालुवाटारमा भएको १० दलको बैठकले उनलाई विश्वासको मत दिने सहमति जुटाएको थियो। नेकपा एमाले संसदीय दल उपनेता सुवास नेम्वाङले प्रधानमन्त्री दाहाललाई पार्टीले विश्वासको मत नदिने बताइसकेका छन्।