८३ करोड लगानीमा रौतहटमा अथर्व टेक्सटाइल सञ्चालनमा आउँदै, असारदेखि कपडा उत्पादन थाल्ने

काठमाडौँ: पछिल्ला तीन वर्षयता मुलुकको अर्थतन्त्र शिथिल बनेको छ। बजारमा माग बढ्न सकेको छैन। बैंक तथा वित्तीय संस्थाहरूबाट कर्जाको माग न्यून रहेको छ। तर, यही वेला डा.  शम्भुकुमार चौधरी र डा. मधु जयसवालले संयुक्त लगानीमा कपडा उद्योग सञ्चालनमा ल्याउन लागेका छन्।

अथर्व टेक्सटाइलको कारखाना पूर्वाधार बनाउन ८३ करोड रुपैयाँ लगानी भएको छ। उद्योगको ९८ प्रतिशत वित्तीय प्रगति भएको छ। उद्योग आउँदो असार अन्तिमदेखि सञ्चालनमा ल्याउने तयारी छ। उद्योगबाट परीक्षण उत्पादन पनि भइसकेको छ।

उद्योगको पूर्वाधार निर्माण झण्डै १३ महिना ढिलाइ हुन गएको छ। यसबीचमा उद्योगको लागत २८ प्रतिशत बढेको जनाएको छ। यसअघि ६४ करोड ५० लाख रुपैयाँ लागत अनुमान गरिएकोमा बढेर झण्डै ८३ करोड रुपैयाँ पुगेको छ।

उद्योगको लागत बढेपछि लगानी संरनामा पनि परिर्तन गरिएको छ। जसअनुसार ६२ प्रतिशत ऋण र बाँकी ३८ प्रतिशत स्वपुँजी (इक्विटी) हुने गरी लगानी संरचना बनाइएको छ। यसअघि ऋण स्वपुँजी अनुपात ६९ः३१ प्रतिशत थियो।

रौतहटको हर्सहामा कारखाना रहेको छ। उद्योगको कपडा उत्पादन क्षमता वार्षिक तीन हजार ६०० टन हुनेछ। अथर्वले बुनाई, रंगाई र प्रशोधन एकाइ स्थापना गर्दैछ। जसमा कपडा उत्पादन गर्ने योजना छ।

कपास, सिंथेटिक र मिश्रित कपडाहरू समावेश छन्। तीन बिघा क्षेत्रफलमा फैलिएको उद्योगमा ताइवानबाट निटिङ मेसिन र टर्कीबाट डाइङ तथा प्रशोधन मेसिन ल्याएर जडान गरिएको छ। यसले टी शर्ट, ट्राउजर, ज्याकेट, पर्दा र बेडसिटहरू उत्पादनहरू गर्ने उद्योगले जनाएको छ।

यस्तै उद्योगले अन्तर्राष्ट्रिय मापदण्डहरू ओकेइटी टिइएक्स र जीओटीएसको पालना सुनिश्चित गर्न रोबोटिक प्रविधिमा आधारित आफ्नै प्रयोगशाला स्थापना गरेको छ। यसले उत्पादनको गुणस्तरमा एकरुपता कायम राख्न मद्दत गर्ने अथर्वले जनाएको छ।

परियोजना अझै निर्माणाधीन भएकोले यो कार्यान्वयन जोखिममा छ। परीक्षण उत्पादनको सफल कार्यान्वयन र त्यसपछि व्यावसायिक सञ्चालन र सञ्चालनको स्थिरीकरण प्रमुख हुनेछ। लागत वृद्धि, कपडा उद्योगमा तीव्र प्रतिस्पर्धासँगै, स्केलेबिलिटी, मूल्य निर्धारण शक्ति र नाफामा चुनौतीहरू खडा गर्न सक्छ। जसले परियोजनाको वित्तीय कार्यसम्पादनलाई असर गर्छ।

नेपाली कपडा उद्योगले मूल्य उतारचढाव जोखिम र विदेशी विनिमय दर उतारचढाव जोखिमको सामना गरिरहेको छ। मुख्यतया कच्चा पदार्थको स्रोतसँग सम्बन्धित। कपास, धागो, रङ र रसायन जस्ता कच्चा पदार्थहरू प्रायः आयात गरिन्छ। जसले गर्दा उत्पादकहरूलाई मुद्रा विनिमय दर उतारचढावको सामना गर्नुपरेको छ।

विनिमय दरमा अचानक परिवर्तनले आयातित सामग्रीको लागत बढाउन सक्छ। जसले गर्दा नाफा मार्जिन र समग्र प्रतिस्पर्धात्मकतामा असर पर्न सक्छ। यसबाहेक, वस्तुको मूल्यमा परिवर्तन र भूराजनीतिक कारकहरू जस्ता विश्वव्यापी बजार गतिशीलताले कच्चा पदार्थको मूल्य अस्थिरतालाई अझ बढाउन सक्छ।

खुला सिमानका कारण भारतबाट ठूलो परिमाणको कपडा चोरी पैठारी हुने गरेको उद्योगीहरूले गुनासो गर्दै आएका छन्। उनीहरूको गुनासो अहिलेसम्म सम्बोधन हुन सकेको छैन्। अथर्व टेक्सटाइल्स सन् २०२१ मा स्थापना भएको हो।