विधान गायब भएको आरोपबारे इप्पानद्वारा खण्डन, साधारणसभा वैधानिक रूपमा हुने दाबी

काठमाडौँ: स्वतन्त्र ऊर्जा उत्पादकहरूको संस्था, नेपाल (इप्पान) ले आफ्नो विधान गायब भएको तथा विधानविपरीत साधारणसभा आयोजना गर्न लागिएको भन्ने आरोपको खण्डन गरेको छ।

इप्पानले सोमबार जारी गरेको प्रेस विज्ञप्तिमा हाल संस्थामा ७०० भन्दा बढी कम्पनी सदस्य आबद्ध रहेको उल्लेख गर्दै आगामी जेठ २९ गते २४औँ वार्षिक साधारणसभा तथा आठौँ अधिवेशन आयोजना हुन लागेको जनाएको छ।

विज्ञप्तिअनुसार २०८० जेठ ३२ गते सम्पन्न २१औँ वार्षिक साधारणसभाले भानुभक्त पोखरेलको संयोजकत्वमा पाँच सदस्यीय विधान संशोधन तथा पुनर्लेखन समिति गठन गरेको थियो। उक्त समितिले संस्थालाई महासंघमा रूपान्तरण गर्ने प्रस्तावसहितको प्रतिवेदन २०८२ जेठ २९ गते पेश गरेको थियो। त्यसपछि २०८२ असार ३१ गते सम्पन्न २३औँ वार्षिक साधारणसभाले सो प्रतिवेदनमाथि छलफल गर्दै कार्यान्वयनका लागि अध्यक्षलाई अख्तियारी दिएको इप्पानले जनाएको छ।

तर, अध्यक्षले महासंघमा रूपान्तरणको प्रक्रिया अघि बढाउन नसक्ने निष्कर्षसहित २०८३ वैशाख ४ गते बसेको २००औँ कार्यसमिति बैठकले विद्यमान विधान २०७८ अनुसार २४औँ वार्षिक साधारणसभा तथा आठौँ अधिवेशन गर्ने निर्णय गरेको विज्ञप्तिमा उल्लेख छ।

यसैबीच, २०८३ जेठ २५ गते सम्पन्न २०३औँ कार्यसमिति बैठकले विधान संशोधनको प्रस्ताव साधारणसभामा लैजाने निर्णय गरेको छ। प्रस्तावअनुसार वरिष्ठ उपाध्यक्ष स्वतः अध्यक्ष हुने व्यवस्था हटाइने तथा विधानअनुसार योग्य भएका कार्यसमितिका सदस्यलाई अध्यक्ष पदमा उम्मेदवारी दिन पाउने व्यवस्था गरिनेछ। अन्य सबै पदमा खुला प्रतिस्पर्धामार्फत उम्मेदवारी दिन सकिने व्यवस्था प्रस्ताव गरिएको इप्पानले जनाएको छ।

इप्पानले संस्थाका उपमहासचिव प्रकाशचन्द्र दुलालले सार्वजनिक रूपमा ‘विधान गायब भएको’ तथा ‘विधानविपरीत साधारणसभा गर्न लागिएको’ जस्ता आरोप लगाएको भन्दै त्यसको घोर भर्त्सना गरेको छ। समितिको प्रतिवेदन सचिवालयमा सुरक्षित रहेको र विधानबारे विभिन्न व्यक्तिबाट प्राप्त सुझावसमेत अभिलेखमा रहेको इप्पानको दाबी छ।

संस्थाले ऊर्जा व्यवसायीहरूको साझा संगठनका रूपमा आफू विधानको परिपालनाप्रति गम्भीर रहेको बताउँदै यस्ता आरोपहरू निराधार र कपोलकल्पित भएको जनाएको छ।

इप्पानले आगामी जेठ २९ गते कार्यसमितिको निर्णयअनुसार वैधानिक रूपमा साधारणसभा तथा अधिवेशन आयोजना गर्न लागिएको जानकारी दिँदै यस सम्बन्धमा जेठ ९ र १० गते सार्वजनिक सूचना प्रकाशित भइसकेको उल्लेख गरेको छ। साथै, भ्रमपूर्ण प्रचारमा नलाग्न र साधारणसभा तथा अधिवेशनलाई सफल बनाउन सबै सदस्य तथा सरोकारवालालाई सक्रिय सहभागिताका लागि आग्रह गरेको छ।