इप्पानमा वरिष्ठ उपाध्यक्ष उम्मेदवार बलराम खतिवडा समूहका यस्ता छन् प्रतिवद्धता

काठमाडौं। स्वतन्त्र ऊर्जा उत्पादकहरूको संस्था, नेपाल (इप्पान) को आगामी निर्वाचनका लागि वर्तमान महासचिव बलराम खतिवडाको नेतृत्वमा प्यानल घोषणा गरिएको छ।

‘परिवर्तनका लागि सहभागीतामूलक/प्रतिनिधिमूलक नयाँ र ऊर्जा क्षेत्रको अनुभवी नेतृत्व’ भन्ने नाराका साथ खतिवडा समूहले आफ्नो विस्तृत प्रतिवद्धतापत्र सार्वजनिक गर्दै चुनावी मैदानमा उत्रिएको हो।

खतिवडा समूहले इप्पानको विधान संशोधन र संस्थागत संरचनामा देखिएको विवादलाई मुख्य एजेन्डा बनाएको छ। प्रतिवद्धता पत्रमा उल्लेख भएअनुसार, २३औं साधारण सभाले इप्पानलाई महासंघीय ढाँचामा लैजाने र वरिष्ठ उपाध्यक्ष स्वतः अध्यक्ष हुने व्यवस्था खारेज गर्ने निर्णय गरे पनि वर्तमान कार्यसमितिले त्यसलाई कार्यान्वयन नगरी पुरानै विधानअनुसार निर्वाचन आह्वान गरेकोमा यो समूहले असन्तुष्टि व्यक्त गरेको छ।

साधारण सभाको निर्णय उल्ट्याएर लोकतान्त्रिक अभ्यासलाई कुण्ठित गर्न खोजिएको भन्दै खतिवडा समूहले संस्थामा सुशासन र विधिलाई स्थापित गर्ने संकल्प गरेको छ। ऊर्जा क्षेत्रको समग्र विकासका लागि यो समूहले १० वर्षमा ३० हजार मेगावाट विद्युत उत्पादन गर्ने सरकारी लक्ष्यमा सहकार्य गर्ने प्रतिवद्धता जनाएको छ।

यस्तै, नेपाल विद्युत प्राधिकरणमा थन्किएका १६ हजार मेगावाटभन्दा बढीका आयोजनाहरूको विद्युत खरिद सम्झौता (पीपीए) तत्काल खुलाउन पहल गर्ने, विद्युत विधेयक र जलस्रोत विधेयकलाई निजी क्षेत्रमैत्री बनाउन दबाब दिने र बैंक तथा वित्तीय संस्थाले ऊर्जा क्षेत्रमा अनिवार्य २० प्रतिशत लगानी गर्नुपर्ने व्यवस्थाका लागि पहल गर्ने जस्ता महत्वपूर्ण योजनाहरू अघि सारेको छ।

इप्पानको आन्तरिक सुदृढीकरणका लागि खतिवडा समूहले सदस्य कम्पनीहरूका समस्या सुन्न हेल्प डेस्क स्थापना गर्ने, ऊर्जा क्षेत्रका पत्रकारहरूको क्षमता अभिवृद्धि गर्ने र तीन वर्षभित्र इप्पानको आफ्नै भवन निर्माण गर्ने लक्ष्य राखेको छ। साथै, निर्माण सम्पन्न भएका आयोजनाहरूको व्यक्तिगत जमानत स्वतः फुकुवा हुने व्यवस्था मिलाउने र बीमा प्रिमियममा देखिएका समस्या समाधान गर्ने प्रतिवद्धता पनि पत्रमा उल्लेख छ।

बलराम खतिवडाको नेतृत्वमा रहेको यस प्यानलबाट वरिष्ठ उपाध्यक्षमा खतिवडा आफैं उम्मेदवार छन् भने उपाध्यक्षहरूमा भरत बहादुर खत्री, भरत प्रसाद नेपाल, कुमार खरेल, दिपक पौडेल र सिर्जना खड्का रहेका छन्।

त्यसैगरी, महासचिवमा प्रकाशचन्द्र दुलाल, सचिवहरूमा कृष्णप्रसाद घिमिरे, ताराबहादुर इस्वो लिम्बु, वीरेन्द्रबहादुर मल्ल, संगीता धमला र इशा श्रेष्ठ तथा कोषाध्यक्षमा मिथुन पौडेल उम्मेदवार रहेका छन्। सदस्यहरूमा सोमनाथ कँडेल, डा. भूषण गुरागाईं लगायत २३ सदस्यीय टोली चुनावी प्रतिस्पर्धामा होमिएको छ।