ठेकेदारलाई धम्काएकोबारे मन्त्रीको प्रष्टीकरण: उहाँहरूलाई बचाउनको लागि भनेको हो

काठमाडौँ: पूर्वाधारमन्त्री सुनिल लम्सालले ठेकेदारको खुट्टा भाँच्न भनेर दिएको अभिव्यक्ति संसद्‌बाट सच्चाएका छन्। उनले बजेटबारे प्रतिनिधिसभामा उठेका प्रश्नको जवाफ दिँदै ठेकेदारहरूलाई गाली गरेको नभई बचाउन खोजेको बताएका छन्।

उनले केही दिनअघि नागढुंगा-मुग्लिन सडक स्तराेन्नति अनुगमनका क्रममा ‘काम गरेन भने खुट्टा भाँचिदिए हुन्छ’ भनेका थिए। उक्त अभिव्यक्तिको सडकदेखि सदनसम्म आलोचना भएको थियो।

उक्त विषयबारे स्पष्टीकरण दिँदै मन्त्री लम्सालले भने, ‘उहाँहरूलाई बढीभन्दा बढी दबाब दिएर भए पनि काम गराउन खोजेको, त्यति हो। उद्देश्य त्यही हो। कसैलाई गाली गर्न मनै छैन नि, काम गर्देओस्, हामी चुपचाप लागेर बस्छौँ नि, खुसी हुन्छौँ। त्यो आशय यति हो हामीले उहाँहरूलाई बचाउनको लागि भनेको हो।’

उनले ठेक्का रद्द भए ठेकेदारको तीन–सात पुस्ता सकिने बताए। ‘मेरो इन्टेन्सन त्यो होइन, इन्टेन्सन काम होस् भन्ने हो। उहाँहरूले काम गर्नुभएन भने हामीले रद्द गर्नुपर्‍यो नि टेन्डर,’ उनले भने, ‘रद्द भयो भने त उहाँहरूको त तीन–सात पुस्ता सकिन्छ। किनभने बैङ्क ग्यारेन्टी थुत्छ। बैङ्क ग्यारेन्टी, फोर्स लोन हुन्छ त्यो। फेरि बाँकी कामको लागि असुल–उपर गर्छ फेरि। त्यो कारणले गर्दा उहाँहरूलाई फेरि उठ्न असजिलो होला भन्ने हुन्छ।’