पूर्वअर्थमन्त्री विष्णु पौडेल सुर्खेतबाट पक्राउ, सम्पत्ति शुद्धीकरणमा अनुसन्धान गरिने

काठमाडौँः एमाले उपाध्यक्ष तथा पूर्वअर्थमन्त्री विष्णु पौडेल पक्राउ परेका छन्। पौडेललाई प्रहरीले सुर्खेतबाट पक्राउ गरेको हो। उनलाई काठमाडौं ल्याउने तयारी भइरहेको छ।

सम्पत्ति शुद्धीकरण अनुसन्धान विभागको पत्रका आधारमा प्रहरीले पौडेललाई नियन्त्रणमा लिएको हो। उनीमाथि गरिएको शेयर कारोबार र सम्पत्तिको स्रोतबारे अनुसन्धान भइरहेका बेला पक्राउ गरिएको जनाइएको छ।

स्रोतका अनुसार पौडेल पार्टीको कार्यक्रममा सहभागी हुन सुर्खेत पुगेका थिए। त्यही क्रममा उनलाई नियन्त्रणमा लिइएको हो। हाल उनलाई जिल्ला प्रहरी कार्यालयमा राखिएको छ भने थप अनुसन्धानका लागि काठमाडौं ल्याउने तयारी भइरहेको प्रहरी स्रोतले जनाएको छ।

काठमाडौं ल्याउन हवाई वा स्थलमार्गमध्ये उपयुक्त विकल्प प्रयोग गरिने बताइएको छ।

पूर्वअर्थमन्त्रीसमेत रहेका पौडेल पक्राउ परेका बेला एमालेले देशभर पार्टी पुनर्गठनसम्बन्धी सुझाव संकलन अभियान सञ्चालन गरिरहेको छ।

सम्पत्ति शुद्धीकरण विभाग र प्रहरीबाट यस विषयमा थप आधिकारिक विवरण सार्वजनिक हुन बाँकी छ।